రాజీనామా చేయనున్న జపాన్‌ ప్రధాని అబె!

అనారోగ్యం కారణంగానేన్న స్థానిక మీడియా

టోక్యో: జపాన్‌ ప్రధాని షింజో అబె రాజీనామా చేయనున్నట్లు సమాచారం. అనారోగ్యం కారణంగా ఆయన ఈ నిర్ణయం తీసుకోనున్నారని శుక్రవారం స్థానిక మీడియాలో వార్తలు వెలువడ్డాయి. 

ఆరోగ్యం మరింత దిగజారుతుండటంతో రాజీనామా చేయాలని అబె భావిస్తున్నారని, ఈ పరిస్థితుల్లో దేశాన్ని నడిపించడం గురించే ఆయన ఆందోళన చెందుతున్నారని అక్కడి జాతీయ మీడియా సంస్థ ఎన్‌ఎచ్‌కే వెల్లడించింది. కాకపోతే ఆ సమాచారాన్ని ధ్రువీకరించలేదు. ఆయన ఆరోగ్య పరిస్థితి బాగోలేదంటూ గత రెండు వారాలుగా పలు వార్తలు వెలువడుతున్నాయి. అయితే ఆయన ఏ అనారోగ్యంతో బాధపడుతున్నారో తెలియనప్పటికీ, వైద్యం నిమిత్తం రెండు సార్లు ఆసుప్రతికి వెళ్లినట్లు సమాచారం. కాగా, కొద్ది గంటల్లో అబె మీడియా సమావేశంలో మాట్లాడనున్న నేపథ్యంలో..అది కూడా రాజీనామాకు గల కారణాలు వివరించడానికేనని సదరు మీడియా సంస్థ పేర్కొంది. 

షింజో అబె ఈ నెలలో మూడు రోజులు సెలవు తీసుకొని, ఏ ప్రకటన చేయకుండా ఆసుపత్రికి వెళ్లారు. కానీ, రెండోసారి వెళ్లిన సమయంలో మాత్రం తాను ప్రధాని పదవిలో కొనసాగాలనుకుంటున్నట్లు వెల్లడించారు.  అయినప్పటికీ ఆయన రాజీనామాపై ఊహాగానాలకు అడ్డుకట్టపడలేదు.