బాలిక హత్యోదంతంపై సిట్‌: నవీన్‌ పట్నాయక్‌

భువనేశ్వర్‌: ఒడిశాలోని నయాగఢ్‌ జిల్లాలో ఐదేళ్ల బాలిక కిడ్నాప్‌, హత్యోదంతంపై ప్రత్యేక దర్యాప్తు బృందాన్ని ఏర్పాటు చేసినట్లు ముఖ్యమంత్రి నవీన్‌ పట్నాయక్‌ శుక్రవారం వెల్లడించారు. ఒడిశా అసెంబ్లీలో ఆయన మాట్లాడుతూ.. ‘నయాగఢ్‌ ఘటన చాలా బాధించింది. ప్రభుత్వం ఎప్పటికీ చట్ట ప్రకారమే నడుచుకుంటుంది. ఈ కేసులో ఎటువంటి చర్యలు తీసుకోవడానికైనా ప్రభుత్వం దర్యాప్తు బృందానికి అన్ని విధాలా సహకరిస్తుంది’ అన్నారు. వీలైనంత త్వరగా నిందితులను పట్టుకోవాలని అధికారులను సీఎం ఆదేశించారు. నయాగఢ్‌‌ జిల్లాలో ఐదేళ్ల బాలికను దుండగులు జులై 4న కిడ్నాప్‌ చేసి హత్య చేశారు. ఈ ఘటనపై సీబీఐ దర్యాప్తు చేయించాలని అసెంబ్లీ సమావేశాల్లో ప్రతిపక్షాలు డిమాండ్‌ చేశాయి. దీంతో అడిషనల్‌ డైరెక్ట్‌ జనరల్‌ యశ్వంత్‌ జెత్వా బేగన్ నేతృత్వంలో ఏడుగురు సభ్యులతో కూడిన ప్రత్యేక దర్యాప్తు బృందాన్ని ఏర్పాటు చేశారు.