ప్రధానిగా ప్రమాణస్వీకారం చేసిన జెసిండా 

వెల్లింగ్టన్‌: న్యూజిలాండ్ ప్రధానిగా జెసిండా ఆర్డెర్న్‌ రెండోసారి ప్రమాణస్వీకారం చేశారు. ఈసారి పూర్తి మెజారిటీ సాధించిన లేబర్‌ పార్టీ నేతగా ప్రధాని పదవిని అధిరోహించారు. వెల్లింగ్టన్‌ అధికార గృహంలో జరిగిన కార్యక్రమంలో జెసిండాతోపాటు ఇతర మంత్రులు ప్రమాణస్వీకారం చేశారు. ‘విశిష్ట ప్రతిభ, అపారమైన అనుభవం కలగలిసిన నేతలతో కలిసి పనిచేసేందుకు ఆసక్తిగా ఎదురుచూస్తున్నాను. దేశం ఎలాంటి సంక్షభంలోకి వెళ్లినా నిబద్ధతలో కలిసి పనిచేసేందుకు సన్నద్ధంగా ఉంటాం’ అని ఈ సందర్భంగా న్యూజిలాండ్‌ ప్రధాని పేర్కొన్నారు.

అక్టోబర్‌ 17న జరిగిన ఎన్నికల్లో జెసిండా ఆర్డెర్న్‌ నేతృత్వం వహిస్తున్న లేబర్‌ పార్టీ ఘన విజయం సొంతం చేసుకుంది. రెండో ప్రపంచయుద్ధం తర్వాత ఇంతటి భారీ విజయం సాధించడం ఇదే మొదటిసారి. గతంలో ఇతర పార్టీలతో కలిసి ప్రభుత్వాన్ని ఏర్పాటుచేసుకున్న పార్టీ ఈ ఘనవిజయంతో మొదటిసారి సొంతంగా ప్రభుత్వాన్ని ఏర్పాటుచేసుకుంది.