ఆ చట్టాలు కశ్మీర్‌లో వర్తించవేం?: ఒమర్‌ 

శ్రీనగర్‌: దేశంలోని పలు ఈశాన్య రాష్ట్రాల్లో ఉన్న ప్రత్యేక భూ చట్టాలు జమ్మూకశ్మీర్‌లో ఎందుకు వర్తించవని మాజీ సీఎం ఒమర్‌ అబ్దుల్లా కేంద్రాన్ని ప్రశ్నించారు. ఇలాంటి వాటిపై ప్రశ్నించినపుడు తామే ఎందుకు దేశద్రోహులం అవుతామని కేంద్రాన్ని నిలదీశారు. ఈ మేరకు ఆయన నేషనల్‌ కాన్ఫరెన్స్‌ కార్యాలయంలో గురువారం మాట్లాడారు. ‘పలు ఈశాన్య రాష్ట్రాల్లో భూములపై ప్రత్యేక హక్కులు కల్పించబడ్డాయి. హిమాచల్‌ప్రదేశ్‌, సిక్కిం, మేఘాలయ, నాగాలాండ్ రాష్ట్రాల్లో ఇతర భారతీయులు భూములు కొనడానికి వీల్లేదు. అలాంటి చట్టాలు జమ్మూకశ్మీర్‌కు ఎందుకు వర్తించవు? ఆ విషయం గురించి ప్రశ్నించినపుడు మేం మాత్రమే ఎందుకు దేశ ద్రోహులమవుతాం?’ అని ఒమర్‌ ప్రశ్నించారు. 

‘జమ్మూకశ్మీర్‌లోని ప్రధాన రాజకీయ పార్టీలను కీలక పాత్ర పోషించకుండా కేంద్రం చేయాలనుకుంటోంది. మన స్వరం బలహీనంగా ఉన్నందుకే ఈ రోజు వాళ్లు(కేంద్రం) తమ ప్రణాళిక అమలు చేశారు. మన ఉనికి, భూమిని కాపాడుకోవడానికి అందరం ఏకమవ్వాలి. రాజ్యాంగ హక్కులను కావాలని శాంతియుతంగా కోరడం తప్పేం కాదు. ఈ రోజు నూతన భూ చట్టానికి వ్యతిరేకంగా శాంతియుతంగా నిరసన చేపట్టడానికి పీడీపీకి అనుమతిఇవ్వలేదు. రాజ్యాంగ పరంగా మా హక్కులను మేం అడగటం కూడా తప్పా’ అంటూ ఒమర్‌ అడిగారు. జమ్మూకశ్మీర్‌లో భూచట్టాల నిబంధనల్లో మార్పులు చేస్తూ కేంద్రం ఇటీవల ఆదేశాలు జారీ చేసిన విషయం తెలిసిందే. ఇకనుంచి జమ్మూకశ్మీర్‌, లద్ధాఖ్‌ కేంద్రపాలిత ప్రాంతాల్లో ఇతర రాష్ట్రాల వ్యక్తులు సైతం భూమి కొనుగోలు చేసేందుకు వెసులుబాటుకల్పిస్తూ ఇటీవలే ఆదేశాలు జారీచేసింది.