ఆత్మనిర్భర్ ఆలోచన కూడా అక్కడిదే: మోదీ

విశ్వ భారతి విశ్వవిద్యాలయ శతాబ్ది ఉత్సవాల్లో ప్రసంగించిన మోదీ

కోల్‌కతా: విద్యాసంస్థలు దేశ స్వాతంత్ర్యం కోసం జరిగిన సిద్ధాంతపరమైన ఉద్యమాలకు కొత్త శక్తిని ఇచ్చాయని ప్రధాని నరేంద్ర మోదీ అన్నారు. గురువారం పశ్చిమ బెంగాల్‌లోని శాంతినికేతన్‌కు చెందిన ‘విశ్వ భారతి విశ్వవిద్యాలయ’ శతాబ్ది వేడుకల్లో మోదీ వీడియో కాన్ఫరెన్స్ ద్వారా ప్రసంగించారు. ఈ క్రమంలో నోబెల్ బహుమతి గ్రహీత రవీంద్రనాథ్ ఠాగూర్ దేశానికి అందించిన సేవలను గుర్తుచేసుకున్నారు.

విశ్వ భారతి వంద సంవత్సరాల ప్రయాణం చాలా ప్రత్యేకమైందని మోదీ అభివర్ణించారు. ఈ విద్యాసంస్థ గురుదేవ్ దూరదృష్టి, కృషికి నిదర్శనమని ఆయన అన్నారు. అంతర్జాతీయ  సౌరకూటమి, పారిస్ ఒప్పందం ద్వారా పర్యావరణ లక్ష్యాలను సాధించడానికి సరైన మార్గంలో ప్రయాణిస్తున్న ఏకైక దేశం మనదేనని ఈ సందర్భంగా ప్రధాని వెల్లడించారు. రవీంద్రనాథ్‌ మార్గదర్శకత్వంలో దేశంలో జాతీయవాద భావనలను పెంపొందించేందుకు ఈ సంస్థ దోహదం చేసిందన్నారు. ఆత్మనిర్భర్ భారత్ కూడా ఈ సెంటిమెంట్‌ నుంచి వికసించిన ఆలోచనేనని వెల్లడించారు. విశ్వ భారతి ఏర్పాటుకు దారితీసిన పరిస్థితులను మనం గుర్తుంచుకోవాలని తెలిపారు. అలాగే ఈ కార్యక్రమంలో ప్రధానితో పాటు పశ్చిమ బెంగాల్ గవర్నర్ జగ్‌దీప్ ధనకర్‌, కేంద్ర విద్యాశాఖ మంత్రి రమేశ్ పొక్రియాల్ కూడా పాల్గొన్నారు. 

ఇవీ చదవండి:

కరోనా: ఆ దేశ ప్రధానిపై రూ.900 కోట్ల దావా

25న రైతులతో మాట్లాడనున్న మోదీ