‘ప్రపంచానికి టీకా సహాయం’ ఎంతో గర్వకారణం!

దిల్లీ: భారత కరోనా టీకా సిద్ధమైతే ప్రపంచదేశాలకు అందించేందుకు‌ సిద్ధమని ప్రధాని నరేంద్రమోదీ హామీ ఇవ్వడం ఎంతో గర్వించదగిన విషయమని సీరమ్ ఇన్‌స్టిట్యూట్‌ ఆఫ్‌ ఇండియా సీఈవో అధార్‌ పునావాలా అన్నారు. ఐక్యరాజ్యసమితి వార్షిక సర్వసభ్య సమావేశంలో ప్రపంచదేశాలకు మోదీ ఇచ్చిన ఆ హామీపై ఆయన ప్రశంసలు కురింపించారు. ఈమేరకు ఆదివారం ట్విటర్‌ వేదికగా వెల్లడించారు. 

‘కరోనా వ్యాక్సిన్‌ సిద్ధమైతే ప్రపంచ దేశాలకు అందజేసేందుకు భారత్‌ సిద్ధంగా ఉందని మోదీ హామీ ఇవ్వడం భారత్‌కు ఎంతో గర్వకారణం. మీ నాయకత్వానికి, మద్దతుకు ధన్యవాదాలు తెలియజేస్తున్నా. దేశం కోసం మీరు చేస్తున్న ప్రయత్నాలు భారతీయుల అవసరాలు తీర్చగలవని దీంతో స్పష్టమవుతోంది’ అని పేర్కొన్నారు. 

ఐక్యరాజ్యసమితి వార్షిక సర్వసభ్య సమావేశంలో శనివారం భారత ప్రధాని నరేంద్రమోదీ 23 నిమిషాల పాటు ప్రసంగించిన విషయం తెలిసిందే. కరోనా సంక్షోభ సమయంలోనూ భారత్‌ 150 దేశాలకు మందుల్ని సరఫరా చేసిందని చెప్పారు. అంతేకాకుండా భారత్‌లో టీకా సిద్ధమైతే కరోనాపై పోరాడేందుకు అందరికీ సహాయం చేస్తామని హామీ ఇచ్చారు.