అమెరికా ఎన్నికలు: అక్కడ అర్ధరాత్రే ఓటింగ్‌

న్యూ హాంప్‌షైర్‌ నుంచి మొదలైన పోలింగ్‌

న్యూ హాంప్‌షైర్‌: ప్రపంచమంతా ఎంతో ఆసక్తిగా ఎదురుచూస్తున్న అమెరికా అధ్యక్ష ఎన్నికల పోలింగ్‌ మొదలైంది. నిజానికి అమెరికా సంయుక్త రాష్ట్రాలన్నీ అక్కడి కాలమానం ప్రకారం.. నవంబరు 3 ఉదయం నుంచి పోలింగ్‌ ప్రారంభిస్తాయి. అయితే ఈశాన్య రాష్ట్రమైన న్యూ హాంప్‌షైర్‌లో మాత్రం అర్ధరాత్రే ఓటింగ్‌ జరుగుతుంది. ఈ ఓటింగ్‌తో అమెరికా ఎన్నికల పోలింగ్‌ మొదలవుతుంది. 

1960 నుంచి హాంప్‌షైర్‌లో ప్రజలు ఇలాగే ఓటేస్తున్నారు. ఈ సారి కూడా నవంబరు 2-3 మధ్య అర్ధరాత్రి దాటిన కాసేపటికి అక్కడ ఓటింగ్‌ జరిగింది. వాటి ఫలితాలు కూడా వచ్చేశాయి. న్యూహాంప్‌షైర్‌లో మొత్తం మూడు టౌన్లు ఉన్నాయి. డిక్స్‌విల్లే నోచ్‌లో జరిగిన ఓటింగ్‌లో మొత్తం 5 ఓట్లు డెమొక్రాటిక్‌ అభ్యర్థి జో బైడెన్‌కే పడ్డాయి. ఇక్కడ అధ్యక్షుడు ట్రంప్‌కు ఒక్క ఓటు కూడా రాలేదు. ఒక మరో టౌన్‌ మిల్స్‌ఫీల్డ్‌లో ట్రంప్‌కు 16 ఓట్లు రాగా.. బైడెన్‌కు ఐదు ఓట్లు పోలయ్యాయి. 

ఇక ఈ రాష్ట్రంలోని మరో టౌన్‌ హార్ట్స్‌ లొకేషన్‌ మాత్రం ఈసారి తమ సంప్రదాయాన్ని పక్కనబెట్టింది. కరోనా దృష్ట్యా ఇక్కడి ప్రజలు అర్ధరాత్రి ఓటింగ్‌కు ముందుకు రాలేదు. మిగతా రాష్ట్రాల మాదిరిగానే నవంబరు 3 ఉదయం తమ ఓటు హక్కు వినియోగించుకోనున్నారు. హార్ట్స్‌ లొకేషన్‌లో మొత్తం 48 మంది ఓటర్లు ఉన్నారు. ఇక అమెరికా వ్యాప్తంగా అధ్యక్ష ఎన్నికల పోలింగ్‌ అక్కడి కాలమానం ప్రకారం.. నవంబరు 3 ఉదయం 6 గంటలకు మొదలవనుంది. పోలింగ్‌ ముగిసే సమయం మాత్రం ఆయా రాష్ట్రాలను బట్టి ఉంటుంది.