కొవిడ్‌తో రక్తం గడ్డకట్టే ప్రమాదం

తాజా ఆధారాలతో నిపుణుల విశ్లేషణ

దిల్లీ: కొవిడ్‌ కేవలం ఊపిరితిత్తుల వ్యాధి మాత్రమే కాదని... రక్తనాళాల రుగ్మత గానూ పరిగణించవచ్చని నిపుణులు విశ్లేషిస్తున్నారు. ఈ ఇన్‌ఫెక్షన్‌ కారణంగా రక్తం గడ్డకడుతోందని, అవయవాలను కాపాడేందుకు ఒక్కోసారి గడ్డలను తొలగించాల్సి వస్తోందని పేర్కొంటున్నారు. ఇప్పటివరకూ జరిగిన అధ్యయనాల ప్రకారం- ఆసుపత్రుల్లో చేరుతున్న కొవిడ్‌ బాధితుల్లో 14-28% మంది డీప్‌ వీన్‌ థ్రోంబోసిస్‌ (డీవీటీ)కు గురవుతున్నారు. వీరికి కాళ్లలోని నాళాల్లో రక్తం గడ్డకడుతోంది. ఇక 2-5% మందికి హృద్ధమనుల్లో రక్తం గడ్డల్లా పేరుకుపోతోంది. ధమనులు గుండె నుంచి అధిక ఆక్సిజన్‌తో రక్తాన్ని శరీరానికి తీసుకెళ్తే... సిరలు అక్కడి నుంచి తక్కువ ఆక్సిజన్‌తో కూడిన రక్తాన్ని గుండెకు తిరిగి చేరుస్తాయి. రక్తం గడ్డకట్టడం వల్ల ప్రసరణలో ఇబ్బందులు తలెత్తి... 2-5% మంది కొవిడ్‌ బాధితుల్లో గుండెపోటు, పక్షవాతం, అవయవ నష్టం సంభవిస్తోంది. ‘‘మా ఆసుపత్రిలో వారానికి కనీసం 5-6 కేసుల్లో రక్తం తీవ్రస్థాయిలో గడ్డకట్టే పరిస్థితి కనిపిస్తోంది. కొద్దిరోజులుగా ఇలాంటి బాధితుల సంఖ్య పెరుగుతోంది’’ అని దిల్లీలోని సర్‌ గంగారామ్‌ ఆసుపత్రి సర్జన్‌ డా.అంబరిష్‌ సాత్విక్‌ చెప్పారు. ముఖ్యంగా టైప్‌-2 మధుమేహంతో ఇబ్బందులు పడుతున్న కొవిడ్‌ బాధితుల్లో ఈ పరిస్థితి ఎక్కువగా ఉంటున్నట్టు దిల్లీలోని ఆకాశ్‌ హెల్త్‌కేర్‌ హృద్రోగ నిపుణుడు అమరీశ్‌ కుమార్‌ చెప్పారు. ‘‘రక్తం గడ్డకట్టే పరిస్థితికి కొవిడ్‌ దారితీస్తోంది. ఓ కోవిడ్‌ బాధితుడి ధమనుల నుంచి ఇలాంటి గడ్డలను విజయవంతంగా తొలగించాం కూడా. ఏడాదిగా తీవ్రస్థాయి కొవిడ్‌ బాధితులను చూస్తున్నాం. ఈ ఇన్‌ఫెక్షన్‌ కారణంగా ఊపిరితిత్తులకు ఎంత ఇబ్బంది కలుగుతోందో, రక్తనాళాలకూ అంతే హాని జరుగుతోంది’’ అని సాత్విక్‌ చెప్పారు. కొవిడ్‌కూ, రక్తం గడ్డకట్టడానికి మధ్య దగ్గరి సంబంధం ఉన్నట్టు ప్రముఖ వైద్య జర్నల్‌ ‘ద లాన్సెట్‌’ ఇప్పటికే పలు అధ్యయనాలను విశ్లేషించింది.