ఆ విద్యార్థులకు 7.5శాతం రిజర్వేషన్‌

ప్రభుత్వ పాఠశాల విద్యార్థులకు వైద్యవిద్యలో ప్రాధాన్యత
ఆమోదం తెలిపిన తమిళనాడు గవర్నర్‌

చెన్నై: ప్రభుత్వ పాఠశాలల్లో చదువుకున్న విద్యార్థులకు వైద్యవిద్యలో ప్రాధాన్యం కల్పించే రిజర్వేషన్ బిల్లుకు తమిళనాడు గవర్నర్‌ ఆమోదం తెలిపారు. ఈ బిల్లుకు గవర్నర్‌ భన్వరీలాల్‌ పురోహిత్‌ అంగీకరించినట్లు రాజ్‌భవన్‌ ప్రకటించింది. ప్రభుత్వ పాఠశాలల్లో చదువుకున్న విద్యార్థులు.. నీట్‌ పరీక్షల్లో ఉత్తీర్ణులై, వైద్య విద్యనభ్యసించాలనుకునే వారికి 7.5 శాతం రిజర్వేషన్లు కల్పిస్తూ పళనిస్వామి ప్రభుత్వం నిర్ణయం తీసుకుంది. దీన్ని తమిళనాడు మంత్రివర్గం కూడా ఆమోదించింది. ఈ విద్యా సంవత్సరం నుంచే దీన్ని అమలుచేయాలని పళనిస్వామి సర్కార్‌ సంకల్పించింది. అయితే, ఈ బిల్లుకు తొలుత గవర్నర్‌ ఆమోదం లభించలేదు. దీన్ని ఎలాగైనా అమలుచేయాలనే ఉద్దేశంతో తాజాగా ప్రత్యేక జీవో కూడా తీసుకొచ్చింది. ప్రభుత్వం ఈ నిర్ణయం తీసుకున్న మరుసటి రోజే గవర్నర్‌ ఈ బిల్లుకు ఆమోదం తెలిపారు.

ఈ బిల్లు విషయంలో గవర్నర్‌ కావాలనే ఆలస్యం చేస్తున్నారనే ఆరోపణలు వచ్చాయి. బిల్లును ఆమోదించాలంటూ రాష్ట్ర వ్యాప్తంగా నిరసనలు వ్యక్తమయ్యాయి. కోర్టులో కూడా ప్రజాప్రయోజనాల వ్యాజ్యం దాఖలైంది. మరోవైపు నీట్‌ కౌన్సిలింగ్‌ కూడా దగ్గర పడుతుండడంతో గవర్నర్‌ ఆమోదం తెలుపుతూ నిర్ణయం తీసుకున్నారు. దీనిపై న్యాయపరమైన సలహాలు తీసుకున్న వెంటనే బిల్లుకు ఆమోదం తెలిపినట్లు రాజ్‌భవన్‌ ప్రకటించింది. ఈ చట్టం ద్వారా 6 నుంచి 12వ తరగతి వరకు అక్కడి ప్రభుత్వ పాఠశాలల్లో చదువుకున్న, నీట్‌లో ఉత్తీర్ణులైన వారికి 7.5శాతం రిజర్వేషన్‌ లభించనుంది.