Vehicle Horn: హారన్‌ కొడితే.. భారతీయ సంగీతం! 

వాహనాల విషయంలో సరికొత్త చట్టం తీసుకొచ్చే యోచన: గడ్కరీ 

నాసిక్‌: వాహనాల హారన్లను వినసొంపుగా మార్చే దిశగా యోచిస్తున్నట్లు కేంద్ర రవాణా శాఖ మంత్రి నితిన్‌ గడ్కరీ తెలిపారు. పిల్లనగ్రోవి, తబలా, వయోలిన్, మౌత్‌ ఆర్గాన్, హార్మోనియం వంటి భారతీయ సంగీత సాధనాల ద్వారా రూపొందించిన ధ్వనినే వాహనాలు హారన్లుగా ఉపయోగించేలా కొత్త చట్టం తీసుకొచ్చేందుకు ప్రణాళికలు రూపొందిస్తున్నట్లు చెప్పారు. ప్రస్తుతం అంబులెన్సులు, పోలీసు వాహనాలకు వినియోగిస్తున్న సైరన్‌ ప్రజలకు చికాకు పుట్టించేలా ఉంటోందని ఆయన పేర్కొన్నారు. దాని స్థానంలో.. ‘ఆకాశవాణి’ ట్యూన్‌ను ప్రవేశపెట్టే దిశగా కూడా యోచిస్తున్నట్లు వెల్లడించారు.