twitter: దావా పరిష్కారానికి రూ.5,971 కోట్లు

చెల్లించేందుకు ముందుకొచ్చిన ట్విటర్‌

శాన్‌ఫ్రాన్సిస్కో: వినియోగదారుల సంఖ్యను ఎక్కువ చేసి చూపడం ద్వారా పెట్టుబడిదారులను తప్పుదోవ పట్టించారంటూ దాఖలైన దావాను పరిష్కరించుకునేందుకు ఏకంగా రూ.5,971 కోట్ల మేర చెల్లించేందుకు ‘ట్విటర్‌’ సంస్థ ముందుకొచ్చింది. ట్విటర్‌ సోమవారం స్వయంగా ఈ విషయాన్ని వెల్లడించింది. సంబంధిత మొత్తాన్ని 2021 నాలుగో త్రైమాసికంలో చెల్లించాలని యోచిస్తున్నట్లు తెలిపింది. ఈ ప్రతిపాదనకు జడ్జి అంగీకారం తెలపాల్సి ఉంటుంది. ట్విటర్‌ ఉన్నతాధికారులు 2014లో ఉద్దేశపూర్వకంగా తమ వినియోగదారుల సంఖ్యను ఎక్కువ చేసి చూపించారని ఆరోపిస్తూ.. సంస్థ పెట్టుబడిదారుల్లో ఒకరైన డోరిస్‌ షెన్‌విక్‌ 2016లో కోర్టులో వ్యాజ్యం దాఖలు చేసిన సంగతి గమనార్హం.