కశ్మీర్‌లో ముగ్గురు ఉగ్రవాదుల హతం

శ్రీనగర్‌: జమ్మూకశ్మీర్‌లో ఉగ్రవాదులు, భద్రతా బలగాలకు మధ్య ఎదురుకాల్పులు చోటుచేసుకున్నాయి. ఈ తెల్లవారుజామున జరిగిన ఘటనలో ముగ్గురు ముష్కరులు హతమయ్యారు. ఉగ్రవాదుల్ని మట్టుబెట్టే క్రమంలో ఓ పోలీసు అధికారి సైతం అమరుడయ్యాడు. పోలీసుల తెలిపిన వివరాల ప్రకారం.. శనివారం వేకువజామున ముష్కరులు పంథా చౌక్‌ చెక్‌పోస్ట్‌ వద్ద విధులు నిర్వహిస్తున్న ఓ పోలీసు, సీఆర్‌పీఎఫ్‌ జవాన్‌పై కాల్పులకు తెగబడ్డారు.

దీంతో వెంటనే అప్రమత్తమైన స్థానిక భద్రతా బలగాలు పోలీసులతో కలిసి గాలింపు చేపట్టారు. ఈ క్రమంలో ముష్కరులు మరోసారి కాల్పులు ప్రారంభించడంతో ఇరు వర్గాల మధ్య ఎదుకాల్పులు చోటుచేసుకున్నాయి. దీంతో ముగ్గురు ముష్కరుల అక్కడికక్కడే హతమయ్యారు. ఇంకా ఆ ప్రాంతంలో గాలింపు చర్యలు కొనసాగుతూనే ఉన్నాయి. గత మూడు రోజుల్లో జరిగిన వివిధ ఎన్‌కౌంటర్లలో భద్రతా బలగాలు పది మంది ముష్కరుల్ని అంతమొందించాయి. మరో ఉగ్రవాది లొంగిపోవడంతో అతణ్ని అదుపులోకి తీసుకొని విచారిస్తున్నారు.