కమల గెలుస్తుందని ముందే చెప్పా

ఆనందం వ్యక్తం చేసిన మేనమామ

దిల్లీ: అగ్రరాజ్యం అమెరికా ఉపాధ్యక్షురాలిగా ఎన్నికైన భారత సంతతికి చెందిన కమలా హారిస్‌ గెలుస్తుందని ముందే చెప్పానని పేర్కొంటున్నారు ఆమె మేనమామ గోపాలన్‌ బాలచంద్రన్‌. ఫలితాలకు ఒకరోజు ముందే నువ్వు గెలువబోతున్నావని చెప్పానని గర్వంగా పేర్కొన్నారు. దిల్లీలో స్థిరపడ్డ బాలచంద్రన్ హారిస్‌ విజయం పట్ల ఆనందం వ్యక్తం చేశారు. ‘బైడెన్‌-హారిస్‌ల విజయాన్నే మనమందరం కోరుకున్నాం. కమలతో నిన్ననే మాట్లాడా. నువ్వు‌ విజయం సాధించబోతున్నావ్‌ అని అప్పుడే చెప్పా’ అని బాలచంద్రన్‌ పీటీఐకి తెలిపారు.

అగ్రరాజ్యం అధ్యక్ష ఎన్నికల ఫలితాల ఉత్కంఠకు తెరపడింది. అమెరికా 46వ అధ్యక్షుడిగా డెమొక్రాట్ల అభ్యర్థి బో బైడెన్‌ విజయం సాధించారు. ఉపాధ్యక్షురాలిగా ఎన్నికైన కమలా హారిస్‌ చరిత్ర సృష్టించారు. ఆ పదవి చేపట్టనున్న మొట్టమొదటి మహిళగానూ, మొట్టమొదటి ఆసియన్‌-అమెరికన్‌గా నిలిచారు. హారిస్‌ విజయంతో అమెరికాతో పాటు భారత్‌లోనూ సంబరాలు జరుగుతున్నాయి. తమిళనాడులో ఆమె పూర్వీకుల గ్రామంలో వేడుకలు మిన్నంటాయి.