అందుకే అర్ధరాత్రి అంత్యక్రియలు..

సుప్రీంకు వివరించిన యూపీ ప్రభుత్వం

దిల్లీ: హాథ్రస్‌ ఘటనలో బాధితురాలికి అర్ధరాత్రి దహన సంస్కారాలు నిర్వహించడానికి గల కారణాలను ఉత్తర్‌ ప్రదేశ్‌ ప్రభుత్వం సుప్రీం కోర్టుకు వివరించింది. మరుసటి రోజు భారీ స్థాయిలో శాంతిభద్రతలకు ముప్పు తలెత్తే అవకాశం ఉందన్న ఇంటెలిజెన్స్‌ నివేదిక కారణంగానే తాము ఆ విధంగా చేయాల్సి వచ్చిందని తెలిపింది. ఈ ఘటనలో దాడికి గురైన 19 ఏళ్ల దళిత యువతి.. సెప్టెంబర్‌ 29 ఉదయం దిల్లీ సఫ్దర్‌జంగ్‌ ఆస్పత్రిలో మరణించింది. కాగా ఆమె మృతదేహాన్ని స్వగ్రామానికి తరలించిన పోలీసులు.. అదే రోజు రాత్రి 2:30 గంటలకు కుటుంబ సభ్యులెవరూ లేకుండానే అంత్యక్రియలు నిర్వహించిన సంగతి తెలిసిందే. కాగా ఈ విషయమై యూపీ ప్రభుత్వం సర్వోన్నత న్యాయస్థానానికి ఓ అఫిడవిట్‌ సమర్పించింది.

‘‘సఫ్దర్‌జంగ్‌ ఆస్పత్రి వద్ద చోటుచేసుకున్న ధర్నా మాదిరిగానే మరిన్ని అవాంఛనీయ సంఘటనలు జరిగే అవకాశం ఉన్నట్లు హాథ్రస్‌ జిల్లా యంత్రాంగానికి సెప్టెంబర్‌ 29 ఉదయం నిఘా వర్గాల నివేదికలు అందాయి. అంతేకాకుండా ఈ మొత్తం అంశానికి కులం, మతం రంగు పులిమి దానిని స్వప్రయోజనాలకు ఉపయోగించే ప్రయత్నం జరుగుతోందని కూడా నివేదికలో వెల్లడించారు’’ అని దానిలో పేర్కొంది. దీనిని నివారించేందుకే తాము అత్యవసరంగా బాధితురాలి అంతిమ సంస్కారాలు నిర్వహించామని యూపీ ప్రభుత్వం సుప్రీంకు తెలియజేసింది.