డ్రైవింగ్‌ లైసెన్స్‌ల అనుమతుల పొడిగింపు

ఎప్పటి వరకు అంటే...

దిల్లీ: దేశంలో మోటారు వాహనాలకు సంబంధించిన డ్రైవింగ్‌ లైసెన్సు తదితర అనుమతి పత్రాల చెల్లుబాటు తేదీని కేంద్ర ప్రభుత్వం మరోమారు పొడిగించింది. వాహనాలకు సంబంధించిన డ్రైవింగ్‌ లైసెన్సు, వాహన బీమా, రిజిస్ట్రేషన్, ఫిట్‌నెస్‌ తదితర వివిధ పత్రాల చెల్లుబాటు తేదీని రోడ్డు రవాణా, రహదారుల మంత్రిత్వ శాఖ డిసెంబర్‌ 31 వరకు పొడిగించింది. అయితే ఈ వెసులుబాటు ఈ సంవత్సరం ఫిబ్రవరి 1 తరువాత లేదా డిసెంబర్‌ 31 లోగా గడువు ముగియనున్న పత్రాలకు మాత్రమే వర్తిస్తుందని వివరించింది. కాగా, కరోనా లాక్‌డౌన్‌ కారణంగా ఈ విధంగా వాహన పత్రాల గడువు పొడిగించటం ఇది మూడోసారి.

‘‘కొవిడ్‌-19 లాక్‌డౌన్‌ కారణంగా ప్రభావితమైన ప్రస్తుత పరిస్థితిని పరిగణనలోకి తీసుకుంటూ.. పైన చెప్పిన అన్ని ధ్రువపత్రాల చెల్లుబాటు తేదీని పొడిగించాము. ఫిబ్రవరి 2020 అనంతరం లేదా డిసెంబరు 31 లోగా గడువు ముగిసిపోయే వాహన సంబంధ  ధ్రువపత్రాలన్నీ చెల్లుబాటు అవుతాయి. ఆయా ధ్రువపత్రాలను 31 డిసెంబర్‌ వరకు పరిగణనలోకి తీసుకోవాల్సిందిగా సంబంధిత అధికారులకు ఆదేశాలు జారీ అయ్యాయి.’’ అని అధికారిక ప్రకటన తెలియచేసింది.