Reunite: యవ్వనంలో విడిపోయి.. వృద్ధాప్యంలో ఒక్కటై..

52 ఏళ్ల తర్వాత మళ్లీ కలిసిన దంపతులు

మైసూరు, ఈటీవీ భారత్‌: యవ్వనంలో విడిపోయిన ఓ జంట.. వృద్ధాప్యంలో మళ్లీ ఒక్కటైంది. దాదాపు యాభైయ్యేళ్ల క్రితం విడాకులు తీసుకున్న దంపతులు ఇప్పుడు మళ్లీ కలిసి జీవించాలనుకుంటున్నారు. కర్ణాటకలోని ధార్వాడ్‌ జిల్లాలో నిర్వహించిన లోక్‌ అదాలత్‌ కార్యక్రమంలో ఈ వృద్ధ జంటను జడ్జీలు మళ్లీ కలిపారు. బాసప్ప (85), కల్లవ (80) అనే వీరు పెళ్లైన కొద్ది సంవత్సరాలకే మనస్పర్థల కారణంగా 52 ఏళ్ల క్రితం విడాకులు తీసుకున్నారు. అప్పటి నుంచి బాసప్ప ఆమెకు ప్రతినెలా భరణం చెల్లిస్తున్నారు. ఈ మధ్య కొద్ది నెలలుగా ఆయన భరణం ఆపేశారు. దీంతో కల్లవ కోర్టును ఆశ్రయించారు. న్యాయస్థానం ఈ కేసును లోక్‌ అదాలత్‌లో పరిష్కారించాలనుకుంది. అయితే న్యాయమూర్తి ఈ వృద్ధ జంటను చూసి కంగుతిన్నారు. ఇద్దరి మధ్యా రాజీ కుదిర్చారు. దీంతో మళ్లీ కలిసి జీవించేందుకు వారు ఒప్పుకున్నారు. మైసూర్లో విడాకులు తీసుకుని శాశ్వతంగా విడిపోవాలనుకున్న మొత్తం 38 జంటలను ఇటీవల ఈ లోక్‌ అదాలత్‌ ద్వారా తిరిగి కలిపారు.