India Corona Update: 43,994కు తగ్గిన క్రియాశీలక కేసులు

దిల్లీ: భారత్‌లో ఆదివారం ఉదయం 8 గంటలతో ముగిసిన 24 గంటల వ్యవధిలో కొత్తగా 4,777 కరోనా కేసులు నమోదయ్యాయి. దీంతో మహమ్మారి వెలుగులోకి వచ్చిన నాటి నుంచి ఇప్పటి వరకు దేశంలో నిర్ధారణ అయిన కేసుల సంఖ్య 4,45,68,114కు చేరింది. క్రియాశీలక కేసుల సంఖ్య 43,994కు తగ్గింది. ఈ మేరకు కేంద్ర ఆరోగ్యశాఖ ఆదివారం వివరాలను వెల్లడించింది.  

కొత్తగా మహమ్మారి మూలంగా మరో 23 మంది ప్రాణాలు కోల్పోయారు. దీంతో దేశంలో కరోనా మరణాల సంఖ్య 5,28,510కి చేరింది. గతంలో లెక్కలోకి రాని 11 మరణాలను తాజాగా కేరళ గణాంకాల్లో చేర్చింది. వాటిని కూడా కలుపుకొని గత 24 గంటల్లో మరణాల సంఖ్యను కేంద్రం 23గా పేర్కొంది. రివకరీ రేటు 98.72 శాతంగా ఉంది. మొత్తం కేసుల్లో క్రియాశీలక కేసుల వాటా 0.10 శాతం. గత 24 గంటల్లోనే 442 మంది కోలుకున్నారు. రోజువారీ పాజిటివిటీ రేటు 1.58 శాతంగా ఉంది. వారం రోజుల పాజిటివిటీ రేటు 1.63 శాతంగా నమోదైంది. ఇప్పటి వరకు 4,39,95,610 మంది మహమ్మారి నుంచి కోలుకున్నారు. మరణాల రేటు 1.19 శాతంగా ఉంది. కేంద్ర ఆరోగ్యశాఖ వివరాల ప్రకారం.. దేశవ్యాప్తంగా ఇప్పటి వరకు 217.56 కోట్ల వ్యాక్సిన్‌ డోసుల్ని పంపిణీ చేశారు.