Afghanistan: నాగ్​పుర్​లో మాయమై.. తాలిబన్లతో కలిసి ప్రత్యక్షమై

దిల్లీ: భారత్​లో పదేళ్ల పాటు అక్రమంగా నివసించిన ఓ వ్యక్తి అనూహ్యంగా అఫ్గాన్‌లోని తాలిబన్లతో కలిసి ప్రత్యక్షమయ్యాడు. అతడు తుపాకీ పట్టుకొన్న ఫొటో సామాజిక మాధ్యమాల్లో ప్రస్తుతం చక్కర్లు కొడుతోంది. మహారాష్ట్రలోని నాగ్‌పుర్​లో అక్రమంగా నివసిస్తున్న నూర్​ మహ్మద్ అజీజ్ మహ్మద్​ను దేశం నుంచి బహిష్కరించగా.. అతడు తాలిబన్లలో కలిసిపోయాడు. నూర్ మహ్మద్ గత పదేళ్లు నాగ్​పుర్​లోని దిఘోరీలో అక్రమంగా నివసించాడు. నిఘా వర్గాల సమాచారం మేరకు అతడిని అదుపులోకి తీసుకున్న పోలీసులు ఈ ఏడాది జూన్​ 23న అఫ్గానిస్థాన్​ పంపించేశారు. అయితే నూర్‌ తుపాకీ పట్టుకొని తాలిబన్లతో కలిసిన ఫొటో ఒకటి తాజాగా వెలుగులోకి వచ్చింది.

అఫ్గాన్‌ వెళ్లిన అనంతరం నూర్‌ మహ్మద్‌ తాలిబన్లలో కలిసిపోయి ఉండొచ్చని నాగ్‌పుర్‌కు చెందిన సీనియర్ పోలీసు అధికారి వెల్లడించారు. 2010లో 6 నెలల పర్యాటక వీసాపై నాగ్​పుర్​కు వచ్చాడని అంతకుముందు దర్యాప్తులో తేలినట్లు ఆయన తెలిపారు. శరణార్థిగా గుర్తించాలని అతడు చేసిన దరఖాస్తు, అప్పీలును ఐరాస మానవ హక్కుల మండలి తిరస్కరించింది. అప్పటి నుంచి అక్రమంగా నాగ్​పుర్​లోనే ఉన్నాడని అధికారి వెల్లడించారు. నూర్​ అసలు పేరు అబ్దుల్​ హకీ అని.. అతడి సోదరుడు ఎప్పటినుంచో తాలిబన్లతో కలిసి పనిచేస్తున్నట్లు మరో అధికారి తెలిపారు. అదుపులోకి తీసుకున్న సమయంలో నూర్ ఎడమ భుజంలో బుల్లెట్ గాయాలను గుర్తించారు పోలీసులు. సామాజిక మాధ్యమాల్లో పలువురు ఉగ్రవాదులను అతడు అనుసరించినట్లు వెల్లడించారు.