e-Visa For Afghans: అఫ్గాన్‌ పౌరులు ఈ-వీసాలతోనే భారత్‌కు రావాలి..!

స్పష్టం చేసిన కేంద్ర హోంశాఖ

దిల్లీ: అఫ్గానిస్థాన్‌ (Afghanistan)లో పరిస్థితులు నానాటికీ క్షీణిస్తున్న నేపథ్యంలో ఆ దేశ పౌరుల భారత ప్రయాణాలపై కేంద్ర హోంశాఖ కీలక నిర్ణయం తీసుకుంది. అఫ్గాన్‌ దేశస్థులు ఇకపై కేవలం ఈ-వీసాల (e-Visa)తో భారత్‌కు రావాలని వెల్లడించింది. ఈ మేరకు బుధవారం ప్రకటన విడుదల చేసింది. 

‘‘భద్రతా పరంగా అఫ్గాన్‌లో పరిస్థితులు క్షీణిస్తుండటం, e-Emergency X-Misc వీసాలను ప్రవేశపెట్టడం ద్వారా వీసా ప్రక్రియను క్రమబద్దీకరిస్తుండటంతో ఇక నుంచి అఫ్గాన్‌ పౌరులు (Afghan people) కేవలం ఈ-వీసాలతోనే భారత్‌కు రావాలని నిర్ణయించాం’’ అని హోంశాఖ వెల్లడించింది. అంతేగాక, ఇప్పుడు భారత్‌లోని అఫ్గాన్‌ దేశస్థులకు గతంలో జారీ చేసిన వీసాలు ఇకపై చెల్లుబాటు కావని స్పష్టం చేసింది. ఆ దేశ పౌరులు ఇప్పుడు భారత్‌కు రావాలనుకుంటే తప్పనిసరిగా ఈ-వీసాల కోసం దరఖాస్తు చేసుకోవాలని తెలిపింది. అఫ్గాన్‌లో భారత దౌత్య కార్యాలయాలు మూసివేసినందున వీసా దరఖాస్తులను దిల్లీలో పరిశీలించనున్నట్లు అధికారులు తెలిపారు.

తాలిబన్ల (Talibans) ఆక్రమణలతో అఫ్గాన్‌లో కల్లోల పరిస్థితులు నెలకొన్నాయి. ముష్కరుల అరాచక పాలన నుంచి తప్పించుకునేందుకు చాలా మంది ఆ దేశ పౌరులు కాబుల్‌ (kabul) విమానాశ్రయానికి పోటెత్తారు. మరోవైపు అఫ్గాన్‌లో చిక్కుకుపోయిన భారతీయుల తరలింపు కోసం భారత్‌ ప్రత్యేక విమానాలు నడుపుతోంది. భారతీయులతో పాటు అఫ్గాన్‌ సిక్కులు, హిందువులను కూడా మానవతా దృక్పథంతో ఇక్కడకు తీసుకొస్తోంది. ఇందులో భాగంగానే వారి కోసం ఈ-ఎమర్జెన్సీ వీసా (e- emergency visa) విధానాన్ని ప్రవేశపెట్టింది.