అమెరికాను వణికిస్తున్న మంచు తుపాను

వాషింగ్టన్‌: అమెరికాను భారీ మంచు తుపాను ఉక్కిరిబిక్కిరి చేస్తోంది. ముఖ్యంగా టెక్సాస్‌ రాష్ట్రంలో మైనస్‌ 5 డిగ్రీల ఉష్ణోగ్రతలు నమోదు కావడంతో అక్కడి రహదారులన్నీ మంచుతో పేరుకుపోయాయి. మంచు నిండిపోయిన రహదారులపై వాహనాలు నడపడం ద్వారా తరచూ ప్రమాదాలు జరుగుతున్నాయి. హూస్టన్‌ నగర పరిసరాల్లో సుమారు 120 రహదారి ప్రమాదాలు జరిగినట్లు అధికారులు పేర్కొన్నారు. ఓ చోట 10 కార్లు ఒకదానికొకటి ఢీకొన్నట్లు తెలిపారు. దీనికి తోడు అతిశీతల పరిస్థితుల వల్ల విద్యుత్తు వినియోగం భారీ ఎత్తున పెరగడంతో విద్యుత్తు కొరత ఏర్పడింది. దీంతో విద్యుత్తు నిర్వహణ సంస్థలు కోతలు అధికం చేయడంతో ప్రజలు ఇబ్బందులు పడుతున్నారు. కొన్ని రోజులు కరెంటు కోతలకు సిద్ధంగా ఉండాలని అధికారులు వెల్లడించారు. టెక్సాస్‌లో పరిస్థితి దారుణంగా ఉండటంతో అధ్యక్షుడు జో బైడెన్‌ అత్యవసర పరిస్థితిని విధించారు.