Amitabh Bachchan-Anushka: హెల్మెట్లు లేకుండా అనుష్క-అమితాబ్‌.. ముంబయి పోలీస్‌ స్పందన

ముంబయి: ట్రాఫిక్‌ను తప్పించుకొని అనుకున్న సమయానికి తమ గమ్యస్థానాలు చేరేందుకు బాలీవుడ్ స్టార్లు అమితాబ్‌ బచ్చన్‌(Amitabh Bachchan ), అనుష్క శర్మ(Anushka Sharma) ద్విచక్ర వాహనాలను ఆశ్రయించారు. అమితాబ్ కారు దిగి, రోడ్డుపై వెళ్తోన్న ఓ వ్యక్తి బైక్‌ ఎక్కగా.. అనుష్క కూడా దాదాపు ఇలాగే డబ్బింగ్ స్టూడియోకు వెళ్లారు. అయితే వారితోపాటు బండి నడుపుతున్నవారు హెల్మెట్లు పెట్టుకోలేదు. దీనిపై ఇప్పుడు ముంబయి పోలీసులు(Mumbai Police) స్పందించారు. 

ఇటీవల అమితాబ్(Amitabh Bachchan) ఓ సామాన్యుడి బైక్‌పై షూటింగ్‌ స్థలానికి వెళ్తూ ముంబయి వీధుల్లో కనిపించారు. తనకు  లిఫ్ట్‌ ఇచ్చిన వ్యక్తికి థ్యాంక్స్‌ చెప్పారు. ‘‘నువ్వు ఎవరో నాకు తెలీదు.. కానీ సమయానికి నన్ను షూటింగ్‌ జరిగే ప్రదేశానికి తీసుకెళ్లావు. ట్రాఫిక్‌లో చిక్కుకుపోకుండా సాయం చేశావు’’ అంటూ అతడికి ధన్యవాదాలు చెప్పారు. ఇదే విధంగా అనుష్క(Anushka Sharma) కూడా కారులో స్టూడియో వెళ్తుంటే.. చెట్టు పడిపోవడం వల్ల దారంతా ట్రాఫిక్ జామ్ అయింది. దాంతో ఆమె కూడా ఓ వ్యక్తి బండి మీద స్టూడియోకు చేరుకున్నారు. పనిపట్ల వీరికున్న నిబద్ధతను కొందరు ప్రశంసించగా.. మరికొందరు మాత్రం హెల్మెట్లు ధరించలేదని ప్రశ్నించారు.  ఈ విషయాన్ని ముంబయి పోలీసుల దృష్టికి తీసుకెళ్లారు. దీనిపై పోలీసులు స్పందిస్తూ.. ఈ విషయాన్ని ట్రాఫిక్ విభాగం దృష్టికి తీసుకెళ్తామని చెప్పారు. 

ప్రస్తుతం అమితాబ్‌.. ప్రభాస్‌ హీరోగా తెరకెక్కుతోన్న ‘ప్రాజెక్ట్‌ కె’ (Project K)లో నటిస్తున్నారు. మరోవైపు అనుష్క.. భారత మహిళా క్రికెటర్‌ జులన్‌ గోస్వామి జీవిత కథ ఆధారంగా తెరకెక్కుతున్న ‘చక్దా ఎక్స్‌ప్రెస్‌’లో సందడి చేయనున్నారు.