Amul Milk: పాల ధర పెంపు

అహ్మదాబాద్‌: నిత్యావసర ధరలు ఆకాశాన్నంటుతున్న వేళ సామాన్యుడికి మరో షాక్‌..! దేశంలో ప్రముఖ పాల ఉత్పత్తి, మార్కెటింగ్‌ సంస్థ అమూల్‌ పాల ధరను పెంచింది. లీటరు పాలపై రూ.2ల చొప్పున పెంచుతున్నట్టు వెల్లడించింది. అన్ని బ్రాండ్‌లకు ఈ పెంపును వర్తింపజేసింది. దేశ వ్యాప్తంగా జులై 1నుంచి కొత్త ధరలు అమలులోకి వస్తాయని గుజరాత్‌ కో-ఆపరేటివ్‌ మిల్క్‌ మార్కెటింగ్‌ ఫెడరేషన్‌ (జీసీఎంఎంఎఫ్‌) స్పష్టంచేసింది. 

ఉత్పత్తి వ్యయం పెరగడంతో దాదాపు 19 నెలల తర్వాత ధర పెంచినట్టు పేర్కొంది. అమూల్‌ గోల్డ్‌, తాజా, శక్తి, టి స్పెషల్‌ తదితర బ్రాండ్‌లన్నింటిపైనా పెంచిన ఈ ధరలు గురువారం నుంచి అమలు కానున్నాయని అమూల్‌ బ్రాండ్ ఉత్పత్తుల మార్కెటింగ్‌ సంస్థ (జీసీఎంఎంఎఫ్‌) ఎండీ ఆర్‌ఎస్‌ శోధి తెలిపారు. ప్యాకింగ్‌పై అదనపు వ్యయం 30 నుంచి 40శాతం, రవాణాపై 30శాతం, ఇంధన వ్యయం 30 శాతం పెరగడంతో పాల ధరలు పెంచినట్టు చెప్పారు.