Australia Murder: ఆస్ట్రేలియాలో హత్య చేసి.. భారత్‌లో చిక్కి..!

దిల్లీ: ఆస్ట్రేలియాలో ఒక మహిళను హత్యచేసిన కేసులో మనదేశానికి చెందిన వ్యక్తిని శుక్రవారం దిల్లీ పోలీసులు అరెస్టు చేశారు. అక్కడి ప్రభుత్వం అభ్యర్థన మేరకు ఈ అరెస్టు చోటుచేసుకుంది. ఇంతకీ ఏం జరిగిందంటే..?

పంజాబ్‌కు చెందిన రాజ్‌విందర్‌ సింగ్(38) నర్సింగ్‌ అసిస్టెంట్‌. ఆస్ట్రేలియాలోని క్వీన్స్‌లాండ్‌లో ఉద్యోగం చేస్తుండేవాడు. 2018లో తొయా కార్డింగ్లేను హత్య చేసిన కేసులో నిందితుడు. కార్డింగ్లే ఫార్మసీ ఉద్యోగిని. క్వీన్స్‌లాండ్‌ బీచ్‌కు వాకింగ్‌కు వచ్చిన ఆమెను రాజ్‌విందర్ హత్య చేశాడని ప్రధాన ఆరోపణ. దాని తర్వాత రెండు రోజులకు తన కుటుంబం, ఉద్యోగం అన్నింటిని వదిలేసి, భారత్‌కు పారిపోయివచ్చాడు. దాంతో అతడి ఆచూకీ తెలుసుకునేందుకు.. అక్కడి పోలీసులు భారీ రివార్డు ప్రకటించారు. ఈ క్రమంలో భారత్‌లో ఉన్న అతడిని రప్పించేందుకు గత ఏడాది మార్చిలో అక్కడి ప్రభుత్వం మన దేశానికి అభ్యర్థన చేసింది. ఈ నవంబర్‌లో ఆమోదం లభించగా.. శుక్రవారం అతడిని దిల్లీ పోలీసులు అరెస్టు చేశారు. కార్డింగ్లే 2018, అక్టోబర్ 21న కనిపించకుండాపోయింది. తర్వాత రోజు వాంగెట్టి బీచ్‌లో ఆమె మృతదేహం దొరికింది.