Anand Mahindra: గతం వదిలేయ్‌.. భవిష్యత్తుపై హైరానావద్దు.. మహీంద్రా పోస్టు చూడాల్సిందే..!

ముంబయి: ప్రముఖ వ్యాపారవేత్త ఆనంద్‌ మహీంద్రా(Anand Mahindra) ట్విటర్‌లో ఎంత చురుగ్గా ఉంటారో తెలిసిందే. అలాగే ఆయన పెట్టే పోస్టుల్లో ఏదో ఒక చమక్కు ఉండనే ఉంటుంది. తాజాగా సోమవారం ఉదయం ఓ మోటివేషనల్‌ పోస్టు(Motivational post) పెట్టారు. ఒక మనిషి ఆలోచనా విధానాన్ని బట్టి అతడు గతంలోనే ఉండిపోయాడా..? వర్తమానంలో జీవిస్తున్నాడా..? భవిష్యత్తు గురించి హైరానా పడుతున్నాడా..? అని వివరించిన ఒక వెన్‌ డయాగ్రామ్‌ను షేర్ చేశారు.  ‘ఈ ఛార్ట్‌ వైపు నేను చూస్తూనే ఉన్నాను. ఇందులో ఎంతో తత్వం ఉంది. కొత్తగా ఒకవారాన్ని ప్రారంభించేందు ముందు ఇది ఎంతగానో ఉపకరిస్తుంది. గతవారం చేసిన తప్పుల గురించి బాధపడొద్దు. భవిష్యత్తు గురించి వణికిపోవద్దు. వర్తమానంలో ఉంటూ ప్రస్తుత పనిపై దృష్టిపెట్టండి’ అంటూ ఆ ఆ ఛార్ట్‌ను షేర్ చేశారు. అవును సర్ ఇది నిజం అంటూ పలువురు నెటిజన్లు బదులిస్తున్నారు. అయితే మనమూ ఒకసారి ఆ ఛార్ట్‌ను గమనిద్దామా..!