Rishi Sunak: ఆయన సూపర్‌ స్మార్ట్.. పొందికగా మాట్లాడగల నేర్పరి..!

దిల్లీ: భారత మూలాలున్న బ్రిటన్ ప్రధాని రిషి సునాక్‌ను ప్రముఖ వ్యాపారవేత్త ఆనంద్‌ మహీంద్రా ప్రశంసించారు. ఆయన చాలా స్మార్ట్‌ అని, ప్రతిమాటా ఆచితూచి మాట్లాడతారని కొనియాడారు. 

‘ఆయన ముందు భయానకరీతిలో సవాళ్లు కుప్పగా పేర్చిఉన్నాయి. వాటిని ఎదుర్కొనే క్రమంలో ఆయన విజయం సాధించొచ్చు, విఫలం కావొచ్చు. అది ఆయనలో సత్తా లేకపోవడం వల్ల కాదు. ఆయన చురుకైన వ్యక్తి. సునిశిత దృష్టి కలవారు. ఆచితూచి ఎంతో పొందికగా మాట్లాడగల నేర్పరి’ అని ట్విటర్‌లో రాసుకొచ్చారు. బ్రిటన్‌ ప్రధానిగా నియమితులైన తర్వాత సునాక్‌ మీడియాతో మాట్లాడిన వీడియోను మహీంద్రా షేర్ చేశారు. 

కొద్దికాలంగా బ్రిటన్ ఆర్థిక సంక్షోభం ఎదుర్కొంటోంది. ఈ పరిస్థితుల నుంచి గట్టెక్కించడమే రిషి ముందున్న అతిపెద్ద సవాల్‌. బ్రిటన్‌ ద్రవ్యోల్బణం 10శాతం మించిపోతోంది. జీ7 దేశాల్లో ఇదే అత్యధికం. ఇంధన టారిఫ్‌లు, ఆహార ధరలు భారీగా పెరిగాయి. సంపాదన తగ్గుతూ.. జీవన వ్యయం పెరుగుతోందని పౌరులు ఆందోళన చెందుతున్నారు. ఇలా మాంద్యం భయాలు నెలకొన్న బ్రిటన్‌లో.. మార్కెట్లను శాంతపరచి, దేశాన్ని ఆర్థిక సంక్షోభం నుంచి గట్టెక్కించి అక్కడి ప్రజల్లో ఆయన విశ్వాసాన్ని నింపగలరో లేదో చూడాలి..!