Anand Mahindra: రూ.ఎన్ని కోట్లు పెట్టినా.. ఇంత ఉత్కంఠ తేలేరు..!

ముంబయి: ప్రముఖ వ్యాపారవేత్త ఆనంద్ మహీంద్రా ఎప్పటికప్పుడు వర్తమాన అంశాలను సరికొత్తగా పంచుకుంటారు. ఈసారి ఆయన ఫుట్‌బాల్ ఆట గురించి ప్రస్తావించారు. దీనికి ప్రపంచవ్యాప్తంగా ఉన్న ఆదరణ తెలిసిందే. అందులోనూ ఈ ఏడాది ఫిఫా వరల్డ్ కప్‌ జరుగుతుందంటే అభిమానుల్లో ఆ ఉత్కంఠ ఏ స్థాయిలో ఉంటుందో ప్రత్యేకంగా చెప్పాల్సిన పనిలేదు. ఖతార్ వేదికగా జరిగే వరల్డ్ కప్ టోర్నీ ప్రమోషన్ కోసం ఆ దేశం సహా ఫిపా ఎంతో ఖర్చుచేస్తున్నాయి. ఈ క్రమంలో చిన్నారులకు సంబంధించి మహీంద్రా షేర్ చేసిన వీడియో ఆకట్టుకుంటోంది. 

‘వరల్డ్ కప్‌ టోర్నీ ప్రచారం కోసం ఫిఫా, ఖతార్‌ ఎన్నో కోట్ల రూపాయలు ఖర్చు చేస్తున్నాయి. అయితే ఈ చవకైనా, ఉల్లాసకరమైన వీడియో కలిగించినంత ఉత్కంఠను ఆ ప్రచారంతో వస్తుందని నేను అనుకోవట్లేదు. ఈ ప్రపంచానికి ఫుట్‌బాల్ అంటే ఎంత క్రేజ్‌ ఉంటుందో ఆ పిల్లల వీడియో సరిగా వెల్లడిచేస్తోంది’ అని మహీంద్రా ట్వీట్ చేశారు. అందులో చిన్నారులు ఫుట్‌బాల్ పట్ల చూపుతున్న ఉత్సాహం, మధ్యలో వారు వేస్తోన్న డ్యాన్సులు చూస్తుంటే ముచ్చటేస్తుందని నెటిజన్లు కామెంట్లు పెట్టారు.