Anand Mahindra: నూతన సంవత్సరం వేళ.. ఆనంద్‌ మహీంద్రా పోస్టు చూశారా?

ముంబయి: మహీంద్రా సంస్థల అధినేత ఆనంద్‌ మహీంద్రా (Anand Mahindra) సామాజిక మాధ్యమాల్లో (Social Media) చురుగ్గా ఉంటారు. ఆయన ఏ పోస్టు చేసినా కచ్చితంగా అది ఆసక్తికరంగానో లేదా ఆలోచింపజేసేది గానో ఉంటుంది. తాజాగా నూతన సంవత్సరం (Happy new Year 2023) సందర్భంగా ఆయన ఓ గిరిజన వ్యక్తి డ్యాన్స్‌ చేస్తున్న వీడియోను ట్విటర్‌లో పోస్టు చేశారు. ఎలాంటి భయం, తడబాటులేకుండా ఎంతో సంతోషంగా ఆ వ్యక్తి చేస్తున్న డ్యాన్స్‌ చూస్తే.. మనం ఎన్ని బాధల్లో ఉన్నా.. వాటన్నింటినీ కొంతసేపు మర్చిపోవడం ఖాయం అనేలా ఉంది.

ఈ వీడియోను ట్విటర్‌లో పోస్టు చేస్తూ..‘‘ 2022కి వీడ్కోలు పలికేందుకు నేను ఎంత ఆనందంతో డ్యాన్స్‌ చేయబోతున్నానో ఇక్కడ ఉంది. ఉక్రెయిన్‌లో యుద్ధం, కొవిడ్‌ మళ్లీ ప్రబలడం లాంటి ఘటనలు ఈ ఏడాది చోటు చేసుకున్నాయి. అయితే, అలాంటి విపత్తులను ఈ కొత్త సంవత్సరం సమర్థంగా ఎదుర్కోవాలి’’ అంటూ రాసుకొచ్చారు. ప్రస్తుతం ఈ వీడియో వైరల్‌గా మారింది. విపత్కర పరిస్థితుల నుంచి ప్రపంచం బయటపడేందుకు అన్నిదేశాలూ కలిసి అడుగులు వేయాలంటూ కొందరు యూజర్లు కామెంట్లు పెడుతున్నారు. 2023లో ప్రపంచ వ్యాప్తంగా ప్రజలంతా సుఖసంతోషాలతో, ఆనందంగా జీవించాలని కోరుకుంటున్నారు.