Gyanvapi Masjid: జ్ఞానవాపి మసీదు కేసులో మరో కీలక మలుపు

శివలింగం ‘కార్బన్‌ డేటింగ్‌’ పిటిషన్‌ను స్వీకరించిన అలహాబాద్‌ హైకోర్టు
అంజుమన్‌ ఇంతెజామియా కమిటీకి నోటీసులు

ప్రయాగ్‌రాజ్‌: జ్ఞానవాపి మసీదు కేసులో మరో కీలక పరిణామం చోటు చేసుకుంది. మసీదులోని వాజూఖానాలో లభించిన శివలింగం కార్బన్‌ డేటింగ్‌ను తిరస్కరిస్తూ వారణాసి జిల్లా కోర్టు ఇచ్చిన తీర్పును సవాల్‌ చేస్తూ లక్ష్మీదేవి, మరో ముగ్గురు హిందు మహిళా భక్తులు దాఖలు చేసిన రివిజన్‌ పిటిషన్‌ను అలహాబాద్‌ హైకోర్టు శుక్రవారం విచారణకు స్వీకరించింది. మసీదును నిర్వహిస్తున్న అంజుమన్‌ ఇంతెజామియా కమిటీకి నోటీసులు జారీ చేసింది. గత నెల 14న వారణాసి జిల్లా కోర్టు న్యాయమూర్తి తన తీర్పులో.. శివలింగాన్ని సురక్షితంగా భద్రపరచమని సుప్రీంకోర్టు ఆదేశాలిచ్చిందని, అందుకే వయసు, స్వరూపం నిర్ధారించే కార్బన్‌ డేటింగ్‌ పరీక్షకు అనుమతులు ఇవ్వలేమని పేర్కొన్నారు. మరోవైపు జ్ఞానవాపి మసీదులోని శృంగార గౌరి, ఇతర హిందూ దేవతల విగ్రహాలను పూజించుకొనేందుకు అనుమతి కోరుతూ వేసిన పిటిషన్‌కు విచారణర్హత ఉందంటూ వారణాసి జిల్లా కోర్టు ఇచ్చిన తీర్పును సవాల్‌ చూస్తూ అంజుమన్‌ ఇంతెజామియా మసీదు కమిటీ వేసిన అపీల్‌పై విచారణను అలహాబాద్‌ హైకోర్టు ఈ నెల 22కు వాయిదా వేసింది.