IndianArmy: ఆర్మీ ట్రక్కులో మంటలు.. ఐదుగురు జవాన్ల సజీవ దహనం

పూంచ్‌: జమ్ముకశ్మీర్‌లోని పూంచ్‌ జిల్లాలో రహదారిపై వెళుతున్న ఆర్మీ ట్రక్కులో అకస్మాత్తుగా మంటలు చెలరేగాయి. ఈ ప్రమాదంలో ఐదుగురు జవాన్లు సజీవ దహనమయ్యారు. పిడుగుపాటు వల్లే ట్రక్కులో మంటలు చెలరేగినట్లు తెలుస్తోంది. బింభేర్‌ గాలి నుంచి పూంఛ్‌ జిల్లాలోని సాంగియోట్‌ వైపు వెళ్తుండగా మధ్యాహ్నం 3గంటల సమయంలో ఈ దుర్ఘటన చోటుచేసుకున్నట్టు సైనిక అధికారులు వెల్లడించారు. ఈ ఘటనలో ఐదుగురు సైనికులు మృతిచెందడం విషాదకరమని పేర్కొన్నారు. అయితే, ఈ ఘటనకు గల అసలు కారణాలు మాత్రం తెలియరాలేదు.

మరోవైపు, ఉగ్రవాద దాడి జరిగి ఉంటుందా? అనే కోణంలోనూ అధికారులు ఆరా తీస్తున్నారు. ఇటీవల పంజాబ్‌లోని అత్యంత కీలకమైన బఠిండా సైనిక స్థావరంలో జరిగిన కాల్పుల ఘటన మరవకముందే ఈ విషాదం చోటు చేసుకోవడం తీవ్ర కలకలం సృష్టిస్తోంది. ఈ ఘటనపై విచారణ చేయాలని సైనిక ఉన్నతాధికారులు ఆదేశించారు.