Pakistan: కరాచీలో భారీ పేలుడు.. 12 మంది మృతి

ఇస్లామాబాద్‌: పాకిస్థాన్‌లోని కరాచీలో శనివారం భారీ పేలుడు సంభవించింది. ఇక్కడి షేర్‌షా ప్రాంతంలోని ఓ బ్యాంకు భవనంలో ఈ ఘటన చోటుచేసుకోగా.. దాదాపు 12 మంది మృతి చెందారు. మరో 13 మంది గాయపడినట్లు స్థానిక పోలీసులు వెల్లడించారు. గ్యాస్‌ లీకేజీయే పేలుడుకు కారణమై ఉంటుందని ప్రాథమికంగా భావిస్తున్నట్లు చెప్పారు. బాధితుల్లో అత్యధికులు బ్యాంకు సిబ్బంది, వినియోగదారులేనని స్థానికంగా ఓ వార్తాసంస్థ వెల్లడించింది. పేలుడు ధాటికి రెండంతస్తుల భవనం ధ్వంసమైందని, సమీపంలో పార్క్ చేసిన కార్లు, ద్విచక్ర వాహనాలూ దెబ్బతిన్నాయని తెలిపింది.

శిథిలాల కింద పలువురి సమాధి?

బాంబు డిస్పోజల్ స్క్వాడ్ ఘటనా స్థలానికి చేరుకుందని, ఈ వ్యవహారంపై దర్యాప్తు చేస్తోందని పోలీసులు తెలిపారు. ఈ భవనాన్ని ఓ నాలాపై నిర్మించారని.. అయితే, గ్యాస్‌ పైప్‌లైన్‌ లీకేజీ కారణంగా ప్రమాదం జరిగిందా? లేదా నాలాలో మిథేన్‌ వాయువు పేరుకుపోయి పేలుడు సంభవించిందా? తేలాల్సి ఉందని ఓ సీనియర్‌ అధికారి తెలిపారు. మరోవైపు భవనం శిథిలాల కింద పలువురు సమాధి అయ్యారని ప్రత్యక్ష సాక్షులు తెలిపారు. అధికారులు హుటాహుటిన సహాయక చర్యలు ప్రారంభించారు. శిథిలాలను తొలగించే పనిలో పడ్డారు.