Sierra Leone: సియారా లియోన్‌లో ఘోర ప్రమాదం.. 91 మంది మృతి

ఫ్రీటౌన్‌: పశ్చిమాఫ్రికాలోని సియారా లియోన్‌ రాజధాని రోడ్లు రక్తసిక్తమయ్యాయి. ఎక్కడ చూసినా మృతదేహాలే. కాలిపోయిన శరీర భాగాలే. ఆయిల్‌ ట్యాంకర్‌ పేలిన ఘటనలో 91 మంది మృతిచెందినట్లు సమాచారం. సియారా లియోన్‌ రాజధాని ఫ్రీటౌన్‌లో కొద్ది గంటల క్రితం ఓ ఇంధన ట్యాంకర్‌ ప్రమాదానికి గురైంది. అయితే అందులోని ఇంధనం లీకవుతుండటంతో పలువురు అక్కడికి చేరుకొని దాన్ని సేకరించేయత్నాలు ప్రారంభించారు. ఈ క్రమంలోనే ఆ ట్యాంకర్‌ ఒక్కసారిగా భారీ శబ్దం చేస్తూ పేలిపోయింది. దీంతో ఇంధనాన్ని సేకరించేవారు తునాతునకలయ్యారు. అక్కడి దుకాణాలకు, రోడ్డున వెళ్లేవారికి సైతం మంటలంటుకున్నాయి. దీంతో ఎక్కడ చూసిన కాలిపోయి ఉన్న మృతదేహాలే దర్శనమిస్తున్నాయి.

ఈ ప్రమాదంలో ఇప్పటివరకు మొత్తం 91 మంది మృతదేహాలను స్వాధీనం చేసుకున్నామని అక్కడి అధికారులు వెల్లడించారు. మృతుల సంఖ్య మరింత పెరిగే అవకాశాలు ఉన్నట్లు తెలిపారు. విపత్తు నిర్వహణ బృందాలు అక్కడికి చేరుకొని సహాయక చర్యలు చేపడుతున్నాయి. పట్టణ మేయర్‌ పరిస్థితుల్ని సమీక్షిస్తున్నారు. ఈ దుర్ఘటనపై ఆ దేశాధ్యక్షుడు జూలియస్‌ మాడా బియో తీవ్ర దిగ్భ్రాంతి వ్యక్తం చేశారు. మృతుల కుటుంబాలకు సానుభూతి తెలియజేశారు. ఆత్మీయులను కోల్పోయిన కుటుంబాలు, క్షతగాత్రులకు తమ ప్రభుత్వం అండగా నిలుస్తుందని హామీ ఇచ్చారు.