క్వాడ్‌ అజెండా అదే..! 

* వెల్లడించిన ఆస్ట్రేలియా ప్రధాని స్కాట్‌ మోరిసన్‌

ఇంటర్నెట్‌డెస్క్: క్వాడ్‌ కూటమి ఏర్పడిన తర్వాత నేడు తొలిసారి భారత్‌, అమెరికా, జపాన్‌, ఆస్ట్రేలియా దేశాధినేతల స్థాయి వర్చువల్‌ సమావేశం జరగనుంది. దీనిపై ఆస్ట్రేలియా ప్రధాని స్కాట్‌ మోరిసన్‌ స్పందించారు. ఇండో-పసిఫిక్‌, వాతావరణ మార్పులు, కొవిడ్-19 వ్యాప్తి అంశాలే అజెండాగా ఈ సమావేశం జరగనుందని సిడ్నిలో విలేకర్లకు వెల్లడించారు. ‘‘ఇదొక చారిత్రక సందర్భం.. శనివారం తెల్లవారుజామున సమావేశం జరగనుంది. ఆస్ట్రేలియాకు అత్యంత కీలకమైన ఈ సమావేశం కోసం నేను ఎంతో ఆసక్తిగా ఎదురు చూస్తున్నాను. చాలా సమావేశాలు జరగుతున్నాయి. కానీ, దేశాధినేతల స్థాయిలో జరుగుతున్న ఈ సమావేశం ప్రాధాన్యం వేరు. ఇండో-పసిఫిక్‌లో శాంతి స్థాపనకు సరికొత్త స్థాయిలో ప్రయత్నాలు జరుగుతున్న విషయాన్ని ఈ భేటీ తెలియజేస్తుంది’’ అని వ్యాఖ్యానించారు.

ఈ అనధికారిక బృందంలో భారత్‌, అమెరికా, జపాన్‌, ఆస్ట్రేలియాలు సభ్యదేశాలు. ఇండో-పసిఫిక్‌లో చైనాను కట్టడి చేయడమే లక్ష్యంగా ఇది పనిచేయనుంది. దీనిలో భాగంగా ఈ ప్రాంతంలో చైనా రాజకీయ, వాణిజ్య, సైనిక కార్యకలాపాలను కట్టడి చేయనుంది. వర్చువల్‌గా నిర్వహిస్తున్న ఈ సమావేశం దాదాపు 2 గంటలపాటు జరగనుంది. భవిష్యత్తులో ఈ నేతలు వ్యక్తిగతంగా సమావేశం అయ్యేందుకు అవసరమైన అంశాలు కూడా దీనిలో చర్చించనున్నారు. ఈ దేశాలను ఉద్గార రహితంగా మార్చేందుకు అవసరమైన అంశాలపై కూడా చర్చించనున్నట్లు మోరిసన్‌ పేర్కొన్నారు. భారత్‌లో టీకాల తయారీ సామార్థ్యాన్ని పెంచేందుకు అవసరమైన ఆర్థిక సహకారంపై కూడా చర్చ జరగనుంది.