Holi: హోలీ వేళ.. భారతీయుల పట్ల అభిమానం చాటుకున్న ఆస్ట్రేలియా ప్రధాని

దిల్లీ: హోలీ పండగ వేళ.. ఆస్ట్రేలియాలో నివసిస్తోన్న భారత సంతతికి ఆ దేశ ప్రధాని స్కాట్ మోరిసన్ శుభాకాంక్షలు తెలియజేశారు. ఈ సందర్భంగా ఆస్ట్రేలియన్ల పట్ల భారతీయులు చూపుతున్న శ్రద్ధకు సంతోషం వ్యక్తం చేశారు. 

‘ఈ సంవత్సరం హోలీ మరింత అర్థవంతంగా ఉంది. ఈ కరోనా మహమ్మారి వేళ.. మనకు అందిన సహకారంపై కృతజ్ఞతతో ఉండాలి. ఈ పండగ వేళ ఆస్ట్రేలియాలోని భారత సంతతికి కృతజ్ఞతలు తెలియజేయాలనుకుంటున్నాను. మీరు మీ కుటుంబాల పట్లే కాకుండా ఆస్ట్రేలియన్లందరీ పట్ల చూపిన ప్రేమ, శ్రద్ధకు సంతోషం. చాలా కాలం తర్వాత ఈ వేడుకలు మనల్ని దగ్గర చేశాయి. ఈ వాతావరణం భవిష్యత్తు కోసం ఆశతో సాగేలా స్ఫూర్తినిస్తుంది’ అంటూ హోలీ సందర్భంగా శుభాకాంక్షలు తెలియజేశారు. ఆ దేశంలోని భారత రాయబార కార్యాలయం ఆ సందేశాన్ని ట్విటర్‌లో షేర్ చేసి, ఆయనకు కృతజ్ఞతలు తెలియజేసింది. 

ఇక మోరిసన్ అవకాశం వచ్చినప్పుడల్లా భారత్‌పై తన అభిమానాన్ని చాటుతూనే ఉంటారు. మన వంటల గురించి పలుమార్లు ప్రస్తావించారు. మన ప్రధాని మోదీ, ఆయన మధ్య జరిగే చర్చల్లో పలుమార్లు ఈ సరదా సంభాషణలు వినిపించిన సంగతి తెలిసిందే. ‘సండే స్కోమోసా విత్ మ్యాంగో చట్నీ’ అంటూ మోరిసన్ తాను తయారు చేసిన సమోసా గురించి వెల్లడించి భారతీయుల్ని ఆకట్టుకున్నారు. అలాగే మోదీకి కిచిడీ ఇష్టమని తెలుసుకున్న ఆయన.. ఈ సారి కలిసినప్పుడు దానిని రుచి చూపిస్తానంటూ వ్యాఖ్యానించారు. అందుకు మోదీ చిరునవ్వు చిందిస్తూ.. ఆయన ఆఫర్‌కు ఓకే చెప్పారు.