covid: కొవిడ్‌పై పోరుకు కొత్త ఆయుధం సిద్ధం..!

నేజల్‌ స్ప్రేను పరీక్షించిన ఆస్ట్రేలియా

ఇంటర్నెట్‌డెస్క్‌: కొవిడ్‌పై పోరాటంలో మరో కొత్త ఆయుధాన్ని ఆస్ట్రేలియా శాస్త్రవేత్తలు సిద్ధం చేస్తున్నారు. రక్తం పలుచబడేందుకు వినియోగించే హెపరిన్‌ అనే ఔషధాన్ని వారు పరీక్షించారు. ఇది చాలా చౌకగా లభిస్తుంది. నేజల్‌ స్ప్రేను వాడి ఓ కొవిడ్‌ రోగికి ఈ ఔషధాన్ని ముక్కులో పిచికారీ చేశారు. ఆ తర్వాత అతని నుంచి ఈ వైరస్‌ వ్యాపించిన దాఖలాలు లేవని వెల్లడించారు. కానీ, ఈ పరిశోధన పూర్తయ్యేందుకు 2022 ద్వితీయార్థం వరకు సమయం పట్టొచ్చని వెల్లడించారు. ఒక వ్యక్తికి కొవిడ్‌ సోకిన తొలినాళ్లలో ఈ స్ప్రే ఉపయోగపడొచ్చని శాస్త్రవేత్తలు వెల్లడించారు. దీంతోపాటు వైరస్‌ వ్యాప్తిని కూడా అరికట్టే అవకాశాలున్నట్లు పేర్కొన్నారు. 

ఈ ప్రయోగాలు విజయవంతమైతే కనుక ప్రజలకు మరో రక్షణ కవచం లభిస్తుందని శాస్త్రవేత్తల బృందానికి నాయకత్వం వహిస్తున్న డాన్‌ క్యాంప్‌బెల్‌ బీబీసీకి వెల్లడించారు. ‘‘రద్దీగా ఉండే షాపింగ్‌ లేదా ఫుట్‌బాల్‌ మ్యాచ్‌లకు వెళ్లే సమయంలో ఈ స్ప్రేను ముక్కులో పిచికారీ చేసుకొని వెళ్లే అవకాశం లభిస్తుంది’’ అని డాన్‌ క్యాంప్‌బెల్‌ వెల్లడించారు. 

ఇప్పటికే ప్రపంచ వ్యాప్తంగా పలు  నేజల్‌ స్ప్రేలను పరీక్షించారు. హెపరిన్‌పై పరీక్షలు నిర్వహించడం ఇదే తొలిసారి. ఈ ఔషధం మార్కెట్లో చాలా సులభంగా లభిస్తుంది. దీనిని పీల్చినప్పుడు ఇది నేరుగా రక్తంలో కలవకుండా ముక్కు రంధ్రాల్లో ఉంటుంది. వైరస్‌ దీనికి అతుక్కొని.. శరీర కణాల్లోకి ప్రవేశించకుండా ఉండే అవకాశం ఉందని శాస్త్రవేత్తలు చెబుతున్నారు. ఈ పరిశోధన కోసం విక్టోరియా రాష్ట్ర ప్రభుత్వం 3 మిలియన్‌ డాలర్లను కేటాయించింది. ఫిబ్రవరిలో మొదలుపెట్టిన ఈప్రయోగాల్లో భాగంగా కొవిడ్‌ రోగులున్న 400 గృహాల్లో దీనిని పరీక్షించనున్నారు.