Published : 15 Apr 2022 22:54 IST

Bangladesh: చాక్లెట్‌ కోసం సరిహద్దు దాటి భారత్‌లోకి.. చివరకు జైలుపాలు!

దిల్లీ: బంగ్లాదేశ్‌లో నివసించే టీనేజర్ ఇమాన్ హుస్సేన్‌కు భారత్‌లో లభించే చాక్లెట్‌లంటే మహా ఇష్టం. భారత్​-బంగ్లాదేశ్​కు సరిహద్దుగా ఉండే షాల్డా నది సమీపంలోని ఓ గ్రామంలో ఉండే ఇమాన్‌.. ఈ చాక్లెట్ల కోసం సాహసం చేస్తూ భారత్‌లోకి చొరబడేవాడు. త్రిపుర సిపాహీజలా జిల్లాలోని కలామ్​చౌరా గ్రామానికి గుట్టుగా వచ్చి వెళుతుండేవాడు. ముందు షాల్డా నదిని ఈది, భారత్​ వైపునకు వచ్చేవాడు. తర్వాత సరిహద్దు కంచెలో ఎక్కడైనా రంధ్రాలు ఉన్నాయేమో చూసుకుని.. భారత్​లోకి అడుగుపెట్టేవాడు. దగ్గర్లోని దుకాణంలో చాక్లెట్లు కొనుక్కుని అదే దారిలో తిరిగి వెళ్లిపోయేవాడు.

ఇమాన్​ హుస్సేన్ ‘చాక్లెట్ యాత్రలు’ ఇప్పటివరకు బాగానే సాగాయి. కానీ ఏప్రిల్ 13న అతడి ‘రాకపోకలు’ సాగలేదు. అక్రమంగా సరిహద్దు దాటుతున్న ఇమాన్​ను బోర్డర్‌ భద్రతా దళం పట్టుకుంది. అనంతరం సోనమురా పోలీసులకు అప్పగించగా వారు కోర్టులో హాజరుపరిచారు. దీంతో ఈ బంగ్లాదేశీ టీనేజర్‌కు న్యాయస్థానం 15 రోజుల జ్యుడీషియల్ కస్టడీ విధించింది. ‘బంగ్లాదేశ్‌కు చెందిన బాలుడు చాక్లెట్​ కొనుక్కునేందుకు భారత్​లోకి చొరబడినట్లు విచారణలో అంగీకరించాడు. అతడి వద్ద 100 బంగ్లాదేశీ టాకాలు మాత్రమే ఉన్నాయి. చట్టవిరుద్ధమైన వస్తువులేవీ లేవు. సరైన పత్రాలు లేకుండా భారత్​లోకి ప్రవేశించినందుకే ఇమాన్​ను అరెస్టు చేశాం. విచారణ జరుగుతోంది. రిమాండ్ పూర్తయ్యాక అతడిని మళ్లీ కోర్టులో హాజరుపరచుతాం’ అని సోనమురా పోలీసు అధికారి బనోజ్ బిప్లబ్ దాస్ పేర్కొన్నారు.

ఇమాన్​ కుటుంబసభ్యులెవరూ భారత అధికారుల్ని ఇంకా సంప్రదించలేదని సంబంధిత వర్గాలు వెల్లడించాయి. అయితే, కిరాణా సామగ్రి కొనుక్కునేందుకు, వివాహాలు వంటి కార్యక్రమాలకు హాజరయ్యేందుకు బంగ్లాదేశీలు ఇలా సరిహద్దు దాటి భారత్​లోకి వస్తుంటారని కలామ్​చౌరా వాసి ఇలియుస్ హుస్సేన్ తెలిపారు. మానవతా కోణంలో బీఎస్​ఎఫ్​ వారిని పెద్దగా పట్టించుకోరని, స్మగ్లర్లపై మాత్రమే చర్యలు తీసుకుంటారని వివరించారు.

Read latest India News and Telugu News

 Follow us on Facebook, Twitter, Instagram, Koo, ShareChat and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని