Karnataka: ఆయన ఎన్నికైన సీఎం కాదు.. డబ్బు ఇచ్చి ముఖ్యమంత్రి అయ్యారు..!

బసవరాజు బొమ్మైపై కాంగ్రెస్‌ నేత సిద్ధరామయ్య ఆరోపణ

బెంగళూరు: కర్ణాటక ముఖ్యమంత్రి పదవీ వ్యవహారం దేశ రాజకీయాల్లో మరో చర్చనీయాంశంగా మారుతోంది. రూ.2500కోట్లు ఇస్తే తనకు ముఖ్యమంత్రి పదవి ఇస్తానన్నారంటూ కేంద్ర మాజీ మంత్రి, భాజపా ఎమ్మెల్యే చేసిన వ్యాఖ్యలు ప్రస్తుతం హాట్‌ టాపిక్‌గా మారాయి. ఈ క్రమంలో బసవరాజు బొమ్మై ఎన్నికైన ముఖ్యమంత్రి కాదని కాంగ్రెస్‌ సీనియర్‌ నేత, మాజీ ముఖ్యమంత్రి సిద్ధరామయ్య పేర్కొన్నారు. నగదు మార్పిడితోనే బొమ్మై ఆ పదవిలో నియమితులయ్యారని ఆరోపించారు.

‘బసవరాజు బొమ్మై ఎన్నికైన ముఖ్యమంత్రి కాదు, నియమించిన సీఎం. అందుకే ఆయన ఏమీ చేయడం లేదు. డబ్బు ఇచ్చి ముఖ్యమంత్రి అయ్యారు, ఇంకా పనులు ఎందుకు చేస్తారు..? ఆర్‌ఎస్‌ఎస్‌ ఆయనను ముఖ్యమంత్రి చేసింది. వారి సూచనలు పాటించడమే ఆయన విధి’ అని కాంగ్రెస్‌ సీనియర్‌ నేత, కర్ణాటక మాజీ ముఖ్యమంత్రి సిద్ధరామయ్య ఆరోపించారు. గడిచిన నాలుగేళ్లలో పేద ప్రజలకు ఒక్క ఇల్లు కూడా మంజూరు చేయలేదని.. అటువంటి ప్రభుత్వం అవసరమా అని ప్రశ్నించారు. తాను సీఎంగా ఉన్న సమయంలో రాష్ట్రంలో 15లక్షల ఇళ్లు నిర్మించామని.. గత ఐదేళ్లుగా అధికారంలో ఉన్న భాజపా ఈ విషయంలో సిగ్గుపడాలని అన్నారు.

ఇదిలాఉంటే, రూ. 2500 కోట్లు ఇస్తే ముఖ్యమంత్రి పదవి వరిస్తుందని చెబుతూ కొందరు తనని సంప్రదించారని భాజపా ఎమ్మెల్యే బసనగౌడ పాటిల్‌ యత్నల్‌ చేసిన వ్యాఖ్యలు కర్ణాటక రాజకీయాల్లో హాట్‌ టాపిక్‌గా మారాయి. అయితే, ఎవరు సంప్రదించారనే విషయాన్ని ఆయన వెల్లడించనప్పటికీ.. అటువంటి మోసపూరిత కంపెనీలు ఉన్నాయని ఆ పార్టీ కార్యకర్తలకు చెప్పుకొచ్చారు. ఇదే విషయాన్ని ప్రస్తావిస్తూ భాజపాపై ప్రతిపక్షాలు తీవ్ర విమర్శలు గుప్పిస్తున్నాయి. ఈ వ్యవహారంలో పూర్తి దర్యాప్తు చేపట్టాలని కాంగ్రెస్‌ పార్టీ డిమాండ్‌ చేస్తోంది.