World Record: పళ్లతో 165 కిలోల బరువు ఎత్తిన బిహార్‌ వాసి!

కైమూర్‌: బిహార్‌(Bihar)లోని కైమూర్‌(Kaimur) జిల్లా రామ్‌గఢ్‌కు చెందిన ధర్మేంద్ర కుమార్‌ సరికొత్త రికార్డ్‌ను నమోదు చేశారు. 165 కిలోల బరువును తన పళ్లతో ఎత్తారు. అలా పది సెకన్లపాటు 165 కిలోల బరువును పళ్లతో పైకిలేపి ప్రపంచ రికార్డును నమోదు చేశారు. త్రిపుర (Tripura)లోని అగర్తలా (Agartala)కు చెందిన నేతాజీ వరల్డ్‌ రికార్డ్‌ ఫౌండేషన్‌ (Netaji World Record Foundation) నిర్వహించిన పోటీల్లో ఈ అరుదైన రికార్డ్‌ను ధర్మేంద్ర కుమార్‌ సొంతం చేసుకున్నారు.

ధర్మేంద్ర ఇప్పటివరకు 9 ప్రపంచ రికార్డుల్లో స్థానం సంపాదించారు. ‘హ్యామర్​ హెడ్​మాన్​ ఆఫ్ ఇండియా’గా ఈయన పేరుపొందారు. గతేడాది  డిసెంబరులో అగర్తలలో జరిగిన పోటీల్లో 122 కిలోల బైక్ ను భుజంపై మోస్తూ.. 30 సెకన్లలోనే 100 మీటర్లు పరిగెత్తిన వ్యక్తిగా ధర్మేంద్ర రికార్డు సృష్టించారు. అంతకుముందు తలతో కొబ్బరికాయలు పగలకొట్టడం, పళ్లతో ఇనుమును వంచడం లాంటి అరుదైన రికార్డులు ధర్మేంద్ర పేరిట ఉన్నాయి. బెంగాల్​ నుంచి వచ్చిన కొందరు పళ్లతో 165 కిలోల బరువు ఎత్తాలని తనకు సవాల్‌ విసరడంతో ఈ ఫీట్‌ చేసినట్లు ధర్మేంద్ర తెలిపారు. ప్రస్తుతం ధర్మేంద్ర త్రిపుర రైఫిల్స్​ విభాగంలో జవాన్​గా విధులు నిర్వర్తిస్తున్నారు.