Bihar: అసెంబ్లీ ప్రాంగణంలో కాన్వాయ్‌ అడ్డగింత.. ఆగ్రహంతో మంత్రి చిందులు!

పట్నా: జిల్లా మేజిస్ట్రేట్‌, ఎస్పీ ప్రయాణిస్తున్న వాహనాలు వెళ్లేందుకుగానూ.. తన కాన్వాయ్‌ను అడ్డుకోవడంపై బిహార్‌కు చెందిన ఓ మంత్రి ఆగ్రహం వ్యక్తంచేశారు. తనను ఆపిన సంబంధిత అధికారులను సస్పెండ్‌ చేసేవరకు అసెంబ్లీకి రానని భీష్మించుకు కూర్చున్నారు. ఆయనే రాష్ట్ర కార్మిక, సమాచార సాంకేతిక శాఖల మంత్రి జీవేష్ మిశ్రా. అసెంబ్లీ సమావేశాలకు హాజరయ్యేందుకుగానూ గురువారం కాన్వాయ్‌గా బయల్దేరారు.

అసెంబ్లీ ప్రాంగణంలోకి రాగానే.. పట్నా జిల్లా మేజిస్ట్రేట్‌, ఎస్పీ ప్రయాణిస్తున్న వాహనాలు వెళ్లేందుకుగానూ మంత్రి కాన్వాయ్‌ను నిలిపేశారు. దీంతో ఆయన అక్కడ విధుల్లో ఉన్న సిబ్బందిపై తీవ్ర ఆగ్రహం వ్యక్తం చేశారు. ‘ఇక్కడి ప్రభుత్వమే మేం.. మాతోనే తప్పుగా వ్యవహరిస్తారా’ అంటూ అగ్గిమీద గుగ్గిలమయ్యారు. తాను వేచి ఉండటానికి కారణమైన అధికారులను సస్పెండ్ చేసే వరకు అసెంబ్లీలో అడుగుపెట్టబోనని స్పష్టం చేయడం గమనార్హం.