Manipur: మణిపుర్ సీఎంగా బీరెన్ సింగ్ ప్రమాణం

ఇంఫాల్‌: మణిపుర్​ ముఖ్యమంత్రిగా ఎన్​ బీరెన్​ సింగ్​ సోమవారం ప్రమాణ స్వీకారం చేశారు. ఆ రాష్ట్ర గవర్నర్​ గణేశన్​ ఆయన చేత ప్రమాణం చేయించారు. మణిపుర్‌ సీఎంగా ఆయన రెండోసారి ప్రమాణం చేయడం విశేషం. బీరెన్‌తోపాటు మరో ఐదుగురు ఎమ్మెల్యేలు మంత్రులుగా ప్రమాణం చేశారు. ఇంఫాల్​లో జరిగిన ఈ కార్యక్రమానికి భాజపా జాతీయ అధ్యక్షుడు జేపీ నడ్డా, మణిపుర్‌ భాజపా శాఖ రాష్ట్ర అధ్యక్షుడు అధికారి మయుమ్‌ శారదాదేవి, త్రిపుర సీఎం బిప్లవ్‌ కుమార్‌ సహా పలువురు నేతలు హాజరయ్యారు.

బీరెన్​ సింగ్ హెయ్​గాంగ్​ నియోజకవర్గం నుంచి గెలుపొందారు. ఆయన ప్రత్యర్థి, కాంగ్రెస్​ పార్టీ అభ్యర్థి పంగిజం శరత్​ చంద్ర సింగ్​పై 17వేలకుపైగా ఓట్ల మెజారిటీతో విజయం సాధించారు. దీంతో వరుసగా ఐదోసారి ఎమ్మెల్యే అయ్యారు బీరెన్‌సింగ్‌​. ఈ ఎన్నికల్లో భాజపా ఒంటరిగా పోరులోకి దిగి.. 32 చోట్ల గెలుపొందింది. దీంతో ప్రభుత్వ ఏర్పాటుకు కావాల్సిన మేజిక్​ ఫిగర్​ను సాధించింది.