Mumbai: ముంబయిని కేంద్రపాలిత ప్రాంతంగా చేసేందుకు కుట్రలు.. ఆధారాలున్నాయన్న రౌత్‌!

ముంబయి: మహారాష్ట్ర రాజధాని ముంబయిని కేంద్ర పాలిత ప్రాంతంగా చేసేందుకు భాజపా కుట్రలు పన్నుతోందని శివసేన నేత, ఎంపీ సంజయ్‌ రౌత్‌ ఆరోపించారు. ఇందుకు సంబంధించిన ఆధారాలు తనవద్ద ఉన్నాయన్నారు. ఈ విషయమై ఇప్పటికే కొందరు భాజపా నేతలు కేంద్ర హోంశాఖకు ప్రజెంటేషన్‌ ఇచ్చారన్నారు.

‘‘ముంబయిని కేంద్ర పాలిత ప్రాంతంగా మార్చేందుకు భాజపా ప్రణాళికలు చేస్తోంది. ఎంపీ కిరిట్‌ సోమయాతో పాటు పార్టీ నేతలు, వ్యాపారవేత్తలు ఈ కుట్రలో భాగంగా ఉన్నారు. ఇప్పటికే ఈ బృందం కేంద్ర హోంశాఖకు దీనిపై ప్రజెంటేషన్‌ ఇచ్చింది. గత రెండు నెలలుగా దీనికి సంబంధించి సమావేశాలు, నిధుల సేకరణ కూడా జరుగుతోంది. నేనేం ఆరోపణలు చేయడం లేదు. నా వద్ద పూర్తి సాక్ష్యాధారాలున్నాయి. ముఖ్యమంత్రి ఉద్ధవ్‌ ఠాక్రేకు కూడా ఈ విషయం తెలుసు’’ అని సంజయ్‌ రౌత్‌ మీడియాతో అన్నారు.

రానున్న కొన్ని నెలల్లో కిరిట్‌ నేతృత్వంలోని ఈ బృందం కోర్టును ఆశ్రయించే అవకాశాలున్నాయని రౌత్‌ అన్నారు. ముంబయిలో మరాఠీ ప్రజల సంఖ్య నానాటికీ తగ్గుతున్న నేపథ్యంలో ఈ నగరాన్ని కేంద్ర పాలిత ప్రాంతంగా ప్రకటించాలని ఆ బృందం కోరే అవకాశాలున్నాయని ఆరోపించారు. గతంలో ముంబయి పాఠశాలల్లో మరాఠీ భాష తప్పనిసరి చేస్తూ ప్రభుత్వం తీసుకున్న నిర్ణయాన్ని కిరిట్‌ సవాల్‌ చేసిన విషయాన్ని రౌత్‌ ఈ సందర్భంగా గుర్తు చేశారు.