Bharat Ratna : ప్రధాని మోదీకి భారతరత్న ఇవ్వాలి.. భాజపా ఎంపీ డిమాండ్‌

దిల్లీ: ప్రధాని నరేంద్ర మోదీకి(PM Modi) దేశ అత్యున్నత పౌర పురస్కారమైన భారతరత్న(Bharat Ratna) ఇవ్వాలని భాజపా ఎంపీ జీఎస్‌ దామోర్‌ డిమాండ్‌ చేశారు. గురువారం లోక్‌సభలో కేంద్ర బడ్జెట్‌పై చర్చ సందర్భంగా కేంద్రం ముందు ఈ డిమాండ్‌ను ఉంచారు. ప్రధాని మోదీ సమాజంలోని షెడ్యూల్డ్‌ కులాలు, షెడ్యూల్డ్‌ తెగలతో పాటు అన్ని వర్గాల ప్రజల కోసం చేస్తున్నారన్నారు. అందువల్ల ఆయనకు భారతరత్న పురస్కారం ఇవ్వాలన్నారు. జీఎస్‌ దామోర్‌ మధ్యప్రదేశ్‌లోని రాట్లాం నుంచి లోక్‌సభకు ప్రాతినిధ్యం వహిస్తున్నారు. దేశంలో ఇప్పటివరకు 48మంది విశిష్ట వ్యక్తులకు భారతరత్న పురస్కారాలు ప్రదానం చేసిన విషయం తెలిసిందే.

మరోవైపు, బడ్జెట్‌పై జరిగిన చర్చలో కాంగ్రెస్‌ సభ్యుడు జీఎస్‌ ఔజ్లా మాట్లాడుతూ.. దేశంలో నిరుద్యోగ యువత సంఖ్య పెరిగిపోతుందని ఆందోళన వ్యక్తంచేశారు. ఈ సమస్యను పరిష్కరించేందుకు తగిన చర్యలు తీసుకోవాలని కేంద్రాన్ని కోరారు. ప్రతిపక్షాలు ప్రధాని నరేంద్ర మోదీని విమర్శిస్తున్నాయే తప్ప దూషించడం లేదన్నారు. ఒక దేశ ప్రధానిగా ఆయన విపక్షాల విమర్శలను వినాలని.. ఆయన్ను ఈ దేశంలో ఎవరూ దూషించడం లేదన్నారు. మరోవైపు, ఏఐఎంఐఎం ఎంపీ ఎస్‌ ఐ జలీల్‌ మాట్లాడుతూ.. కేంద్ర ప్రభుత్వం బడ్జెట్‌ కేటాయింపుల్లో మైనార్టీలకు కోత విధించిందని విమర్శించారు. అలాగే, ఆర్‌బీఐ వడ్డీ రేట్ల పెంపు నిర్ణయం వేతన జీవులకు భారం కానుందని ఆవేదన వ్యక్తంచేశారు.