కేజ్రీవాల్‌ రాజీనామాకు భాజపా డిమాండ్‌.. ఆప్‌ కార్యాలయం ముందు ఆందోళన

దిల్లీ: దేశవ్యాప్తంగా సంచలనం సృష్టించిన దిల్లీ మద్యం కుంభకోణం (Delhi excise scam)లో కేజ్రీవాల్‌ పేరు బయటపడడంతో భారతీయ జనతా పార్టీ (BJP) ఆప్‌ సర్కారుపై (AAP) విమర్శల దాడి పెంచింది. దిల్లీకి చెందిన ఆ పార్టీ నేతలు, కార్యకర్తలు శనివారం ఆమ్‌ ఆద్మీ పార్టీ కార్యాలయం ముందు ఆందోళనకు దిగారు. ముఖ్యమంత్రి కేజ్రీవాల్‌ రాజీనామా చేయాలని డిమాండ్‌ చేశారు. ఈ క్రమంలో ఆ పార్టీ కార్యకర్తలకు, పోలీసులకు మధ్య తోపులాట జరిగింది. దిల్లీ మద్యం కుంభకోణంలో ఇటీవల ఈడీ దాఖలు చేసిన అనుబంధ ఛార్జీషీట్‌లో కేజ్రీవాల్‌ పేరు బయటపడిన సంగతి తెలిసిందే.

లిక్కర్‌ స్కామ్‌లో కేజ్రీవాల్‌ పేరు బయటకొచ్చిన నేపథ్యంలో ఆమ్‌ ఆద్మీ పార్టీ సర్కారు గద్దె దిగాలని ఆ పార్టీ దిల్లీ యూనిట్‌ అధ్యక్షుడు వీరేంద్ర సచ్‌దేవ డిమాండ్‌ చేశారు. కేజ్రీవాల్‌ ప్రభుత్వం అవినీతితో దిల్లీని చెదపురుగుల్లా తొలి చేస్తోందని విమర్శించారు. ఏమాత్రం నైతికత ఉన్నా వెంటనే కేజ్రీవాల్‌ తన పదవికి రాజీనామా చేయాలని డిమాండ్‌ చేశారు. లిక్కర్‌ స్కామ్‌లో కేజ్రీవాలే సూత్రధారి అని మొదటి నుంచీ చెప్తూ వస్తోందని దిల్లీ అసెంబ్లీలో ప్రతిపక్ష నేత రామ్‌వీర్‌ సింగ్‌ బిదురి అన్నారు. ఈడీ ఛార్జిషీట్‌లో ద్వారా అది నిజం అని తేలిందన్నారు.

మద్యం కుంభకోణంలో వచ్చిన రూ.100 కోట్లలో కొంత మొత్తాన్ని ఆప్‌ గత ఏడాది గోవాలో ఎన్నికల ప్రచారానికి వినియోగించినట్లు తాము గుర్తించామని ఈడీ తన ఛార్జిషీట్‌లో తెలిపింది.