Avalanche: ఏడుగురు సైనికుల గల్లంతు విషాదాంతం.. అందరూ మృతి

వెల్లడించిన ఆర్మీ అధికారులు

ఇటానగర్‌: అరుణాచల్‌ ప్రదేశ్‌లోని కమెంగ్‌ సెక్టార్‌లో సంభవించిన ఆకస్మిక హిమపాతంలో ఏడుగురు సైనికులు గల్లంతయిన ఘటన విషాదాంతమైంది. ఈ ప్రమాదంలో ఏడుగురూ మృతి చెందినట్లు సైనిక ఉన్నతాధికారులు మంగళవారం వెల్లడించారు. వారి మృతదేహాలను స్వాధీనం చేసుకున్నట్లు తెలిపారు. 19వ జమ్మూ- కశ్మీర్‌ రైఫిల్స్‌ దళానికి చెందిన చెందిన ఏడుగురు సైనికులు పెట్రోలింగ్‌ విధులు నిర్వహిస్తున్న క్రమంలో హిమపాతంలో చిక్కుకుపోయారని సైన్యం సోమవారం వెల్లడించిన విషయం తెలిసిందే. ఎత్తయిన ఈ ప్రాంతంలో కొన్ని రోజులుగా భారీగా మంచు కురుస్తున్న నేపథ్యంలోనే ఈ ప్రమాదం జరిగినట్లు పేర్కొంది.

దీంతో వెంటనే రంగంలోకి దిగిన రెస్క్యూ సిబ్బంది, నిపుణుల బృందం.. వారి ఆచూకీ కోసం ముమ్మర సహాయక చర్యలు చేపట్టింది. ఈ క్రమంలో నేడు వారి మృతదేహాలు లభ్యమయ్యాయి. సముద్ర మట్టానికి 14,500 అడుగుల ఎత్తులో మృతదేహాలు లభ్యమైనట్లు రక్షణశాఖ ప్రతినిధి లెఫ్టినెంట్ కర్నల్ హర్షవర్ధన్ పాండే వెల్లడించారు. మరోవైపు పశ్చిమ బెంగాల్‌ ముఖ్యమంత్రి మమతా బెనర్జీ ఈ ఘటనపై దిగ్భ్రాంతి వ్యక్తం చేశారు. జవాన్లు మన భద్రత కోసం నిస్వార్థంగా కృషి చేస్తున్నారు.. వారికి సెల్యూట్‌ అంటూ ట్వీట్‌ చేశారు.