లిబియాలోకలకలం..సముద్రం ఒడ్డున27 మృతదేహాలు..!

ట్రిపోలి: లిబియాలో సముద్రం ఒడ్డుకు 27 మృతదేహాలు కొట్టుకురావడం కలకలం రేపింది. మృతుల్లో ఓ చిన్నారి, ఇద్దరు మహిళలు కూడా ఉన్నారు. మృతులంతా ఐరోపాకు చెందిన వలసదారులేనని లిబియాకు చెందిన రెడ్​ క్రెసెంట్ సంస్థ వెల్లడించింది. ఖోమ్స్​ పట్టణంలోని రెండు వేర్వేరు ప్రాంతాల్లో శనివారం రాత్రి ఈ మృతదేహాలు కనిపించాయి. మరో ముగ్గురిని సిబ్బంది రక్షించారు. మిగతావారి కోసం గాలింపు చర్యలు కొనసాగుతున్నాయి. ఈ మేరకు రెడ్​ క్రెసెంట్​ సంస్థ కొన్ని ఫొటోలను షేర్ చేసింది. మధ్యధరా సముద్రంలో మృతదేహాలు తేలుతున్నట్లుగా ఆ ఫొటోల్లో కనిపించాయి.

మృతులంతా లిబియాలో ఇటీవల జరిగిన పడవ ప్రమాదంలో మృతి చెందిన వలసదారులేనని తెలుస్తోంది. లిబియా దేశ రాజధాని ట్రిపోలిలో వలసదారులపై అధికారులు అణచివేతను భరించలేక చాలామంది దేశం విడిచి ఐరోపాకు పడవల్లో అక్రమంగా వలస వెళ్తుంటారు. ఈ క్రమంలో పడవ మునక ప్రమాదాల్లో అనేక మంది చనిపోతూ ఉంటారు. మధ్యధరా సముద్రంలో జరిగిన వివిధ పడవ ప్రమాదాల్లో ఈ ఏడాది దాదాపు 1,500 మంది వలసదారులు మృతి చెందారని ఐక్యరాజ్య సమితికి చెందిన ఇంటర్నేషనల్ ఆర్గనైజేషన్ ఫర్ మైగ్రేషన్ తెలిపింది. ఈ నెల ప్రారంభంలో జరిగిన రెండు వేర్వేరు పడవ మునక ప్రమాదంలో 160 మంది వలసదారులు మరణించారని పేర్కొంది.