Earthquake: తుర్కియే భూకంపం.. భారతీయుడి మృతదేహం లభ్యం!

అంకారా: తుర్కియే(Turkey), సిరియా(Syria)ల్లో భూకంపం(Earthquake) మిగిల్చిన విధ్వంసం అంతాఇంతా కాదు! రెండు దేశాల్లో కలిపి ఇప్పటికే దాదాపు 25 వేలకుపైగా పౌరులు ప్రాణాలు కోల్పోయారు. మరోవైపు.. శిథిలాల కుప్పలనుంచి మృతదేహాలు బయటపడుతూనే ఉన్నాయి. తాజాగా తుర్కియేలోని మాలత్య(Malatya) నగరంలో భూకంప ప్రభావిత ప్రాంతంనుంచి ఓ భారతీయుడి మృతదేహాన్ని వెలికితీశారు. తుర్కియేలోని భారత రాయబార కార్యాలయం ఈ విషయాన్ని ధ్రువీకరించింది.

మృతుడిని ఉత్తరాఖండ్‌కు చెందిన విజయ్‌ కుమార్‌గా గుర్తించింది. ఆయనో వ్యాపారవేత్త అని, బిజినెస్‌ ట్రిప్‌ మీద మాలత్యకు వచ్చినట్లు తెలిపింది. భూకంప ఘటన నాటినుంచి ఆచూకీ లేకుండా పోయారని, తాజాగా ఇక్కడి ఓ హోటల్‌ శిథిలాల్లో ఆయన మృతదేహం బయటపడినట్లు వెల్లడించింది. మృతుడి కుటుంబ సభ్యులకు ప్రగాఢ సానుభూతి ప్రకటిస్తూ.. భౌతికకాయాన్ని వీలైనంత త్వరగా భారత్‌కు తరలించేందుకు ఏర్పాట్లు చేస్తున్నట్లు ఓ ప్రకటనలో తెలిపింది.

ఇదిలా ఉండగా. ఫిబ్రవరి 6న సంభవించిన భూకంపం తుర్కియే, సిరియాలను కుదిపేసిన విషయం తెలిసిందే. ఈ క్రమంలోనే సహాయక చర్యలు ముమ్మరంగా సాగుతున్నాయి. అయితే, ఇప్పటికే 5 రోజులు దాటడంతో శిథిలాల కింది చిక్కుకుపోయినవారిలో ఎంతమంది ప్రాణాలతో ఉన్నారో తెలియని పరిస్థితి. అతిశీతల వాతావరణ పరిస్థితులు ఉండటంతో ఆశలు సన్నగిల్లిపోతున్నాయి. మరోవైపు ఈ రెండు దేశాలకు భారత్‌ సహా ప్రపంచ దేశాలు తమ ఆపన్నహస్తం అందిస్తున్నాయి.