Bomb blast: సన్నీ లియోనీ ఫ్యాషన్‌ షో వేదిక సమీపంలో బాంబు పేలుడు..

ఇంఫాల్‌: ఈశాన్య రాష్ట్రం మణిపూర్‌ (Manipur)లో శనివారం ఉదయం శక్తిమంతమైన బాంబు పేలుడు (Bomb Blast) సంభవించింది. రాజధాని ఇంఫాల్‌లో ఓ ఫ్యాషన్‌ షో జరుగుతున్న వేదికకు సమీపంలో ఈ ఘటన చోటుచేసుకుంది. ఇదే ఫ్యాషన్‌ షోలో బాలీవుడ్‌ నటి సన్నీ లియోనీ (Sunny Leone) ఆదివారం పాల్గొననుంది.

శనివారం తెల్లవారుజామున ఈ వేదికకు కేవలం 100 మీటర్ల దూరంలోనే ఈ బాంబు పేలుడు (Bomb Blast) జరిగినట్లు అధికారులు వెల్లడించారు. అయితే ఈ ఘటనలో ఎవరికీ ఎలాంటి హానీ జరగలేదని తెలిపారు. పేలింది ఐఈడీనా లేదా గ్రనేడా అన్నది ఇంకా స్పష్టం కాలేదని చెప్పారు. కాగా.. ఈ పేలుడుకు బాధ్యత వహిస్తూ ఇంతవరకూ ఏ తీవ్రవాద సంస్థ ప్రకటనలు చేయలేదని అధికారులు వెల్లడించారు.

మణిపూర్‌ ఖాదీ, చేనేత వస్త్రాలతో పాటు రాష్ట్ర పర్యాటకాన్ని ప్రచారం చేసే ఉద్దేశంతో హౌజ్‌ ఆఫ్ అలీ అనే సంస్థ ఈ ఫ్యాషన్‌ షో (fashion show) ఏర్పాటు చేసింది. ఇందులో సన్నీ లియోనీ ఆదివారం పాల్గొననున్నారు. అయితే ఈ ఫ్యాషన్‌ షోను కొన్ని అతివాద సంఘాలు నిషేధించాయి. అవే ఈ బాంబు పేలుడుకు పాల్పడి ఉండొచ్చని పోలీసులు భావిస్తున్నారు. ప్రస్తుతం దీనిపై పోలీసులు దర్యాప్తు చేస్తున్నారు.