Petrol bomb: జవాన్ల క్యాంప్‌పై మహిళ బాంబు దాడి.. వీడియో వైరల్

శ్రీనగర్‌: జమ్ముకశ్మీర్‌లో విస్తుపోయే ఘటన చోటుచేసుకుంది. సెంట్రల్ రిజర్వ్ పోలీస్ ఫోర్స్ (CRPF) క్యాంప్‌పై ఓ మహిళ పెట్రోల్‌ బాంబుతో దాడిచేసింది. బారాముల్లా జిల్లా సోపోర్‌లోని సీఆర్‌పీఎఫ్‌ క్యాంప్‌ వద్ద మంగళవారం సాయంత్రం ఈ ఘటన చోటుచేసుకుంది. బుర్ఖా ధరించి రోడ్డుపై నడుచుకుంటూ వచ్చిన మహిళ.. క్యాంప్‌ గేట్‌ వద్ద ఆగి, చేతి సంచిలోనుంచి పెట్రోల్‌ బాంబ్‌ తీసి క్యాంప్‌పై విసిరేసింది. అనంతరం వెంటనే అక్కడినుంచి పారిపోయింది. కాగా ఇందుకు సంబంధించిన ఓ వీడియో ఇప్పుడు వైరల్‌గా మారింది.

అయితే ఈ ఘటనలో ఎవరికీ ఎలాంటి గాయాలు కాలేదని అధికారులు తెలిపారు. ఆ బాంబు సెక్యూరిటీ క్యాంప్‌ బయటే పడిందని, మంటలను జవాన్లు ఆర్పేసినట్లు పేర్కొన్నారు. సదరు మహిళను గుర్తించామని, ఆ ప్రాంతంలో కట్టడిముట్టడి చేపట్టి నిందితురాలి కోసం గాలిస్తున్నట్లు కశ్మీర్‌ ఐజీ విజయ్‌ కుమార్‌ వెల్లడించారు. త్వరలోనే ఆమెను అదుపులోకి తీసుకుంటామని తెలిపారు.