అనిల్‌ దేశ్‌ముఖ్‌కు సీబీఐ సమన్లు

బుధవారం విచారణకు హాజరు కావాలని ఆదేశం

ముంబయి: మహారాష్ట్ర మాజీ హోంమంత్రి అనిల్‌ దేశ్‌ముఖ్‌కు కేంద్ర దర్యాప్తు సంస్థ(సీబీఐ) సమన్లు జారీ చేసింది. అవినీతి ఆరోపణల కేసును ఎదుర్కొంటున్న ఆయనను బుధవారం నాడు విచారణకు హాజరు కావాలని సీబీఐ సూచించింది.

 నెలకు రూ.వంద కోట్లు వసూలు చేయాలంటూ సస్పెండైన పోలీసు అధికారి సచిన్‌ వాజేను అనిల్‌ దేశ్‌ముఖ్‌ ఆదేశించినట్లు ముంబయి మాజీ పోలీస్‌ కమిషనర్‌ పరంబీర్‌ సింగ్‌ ఆరోపణలు చేశారు. అంతేకాకుండా పోలీసు అధికారుల బదిలీల్లోనూ అక్రమాలు చోటుచేసుకున్నాయని ఆరోపించారు. వీటిపై విచారణ జరిపించాలని పరంబీర్‌ సింగ్‌ బాంబే హైకోర్టును ఆశ్రయించారు. విచారించిన బాంబే హైకోర్టు.. ఈ ఆరోపణలపై విచారణ జరపాలని సీబీఐని ఆదేశించింది. దీంతో రంగంలోకి దిగిన సీబీఐ బృందం ఇప్పటికే అనిల్‌ దేశ్‌ముఖ్‌ వ్యక్తిగత సహాయకుడితో పాటు మరికొందరిని విచారించింది. తాజాగా మహారాష్ట్ర మాజీ హోంమంత్రి అనిల్‌ దేశ్‌ముఖ్‌ను విచారణకు హాజరు కావాలని సమన్లు జారీచేసింది. ఈ కేసు విచారణలో భాగంగా సచిన్‌ వాజేకు సన్నిహితుడైన ఓ బార్‌ యజమానిని సీబీఐ విచారించి అతని స్టేట్‌మెంట్‌ రికార్డు చేసింది.

ఇదిలాఉంటే, తనపై వచ్చిన అవినీతి ఆరోపణలపై సీబీఐ విచారణ చేపట్టాలని బాంబే హైకోర్టు ఇచ్చిన ఆదేశాలను నిలిపివేయాలని అనిల్‌ దేశ్‌ముఖ్‌ సుప్రీంకోర్టులో పిటిషన్‌ దాఖలు చేశారు. అయితే, అనిల్‌ దేశ్‌ముఖ్‌ విజ్ఞప్తిని తోసిపుచ్చిన సుప్రీంకోర్టు సీబీఐ దర్యాప్తు కొనసాగుతుందని స్పష్టంచేసింది.