CBI: అమిత్‌ షా భరోసా ఇచ్చారు.. సీబీఐ దర్యాప్తు షురూ: సీఎం బీరెన్‌ సింగ్‌

ఇంఫాల్‌:  మణిపుర్‌(Manipur)లో జులైలో అదృశ్యమైన ఇద్దరు విద్యార్థుల హత్యకు గురైన ఘటనతో అక్కడ మరోసారి తీవ్ర ఉద్రిక్తతలు నెలకొన్నాయి. ఈ కేసులో దర్యాప్తునకు సహకరించేందుకు తమ రాష్ట్రానికి సీబీఐ అధికారుల బృందం చేసుకుందని మణిపుర్‌ సీఎం బీరెన్‌ సింగ్‌(Biren Singh) వెల్లడించారు. సీబీఐ ప్రత్యేక డైరెక్టర్‌ అజయ్ భట్నాగర్‌ సారథ్యంలోని అధికారుల బృందం దర్యాప్తు ప్రారంభించిందన్నారు. ఈ మేరకు బుధవారం మీడియా సమావేశంలో మాట్లాడిన సీఎం.. విద్యార్థులను కిడ్నాప్‌ చేసి హత్య చేసిన కేసులో దోషులను అరెస్టు చేసి శిక్షిస్తామని కేంద్ర హోంమంత్రి అమిత్‌ షా హామీ ఇచ్చారన్నారు. ఇంఫాల్‌లో అడుగుపెట్టిన తర్వాత సీబీఐ అధికారులు దర్యాప్తు ప్రారంభించారన్నారు.  అయితే, సీబీఐ బృందం ఎక్కడికి వెళ్లి దర్యాప్తు చేస్తోందనే విషయాన్ని మాత్రం ఆయన వెల్లడించలేదు. 

మణిపుర్‌లో మరో దారుణం... అదృశ్యమైన ఇద్దరు విద్యార్థుల హత్య

కొన్ని నెలలుగా జాతుల మధ్య హింసతో రగులుతోన్న మణిపుర్‌లో రెండు నెలల క్రితం అదృశ్యమైన ఇద్దరు విద్యార్థులు హత్యకు గురైన ఘటన తీవ్ర కలకలం రేపింది. ఆ విద్యార్థుల మృతదేహాల ఫొటోలు సోమవారం రాత్రి నుంచి.. సామాజిక మాధ్యమాల్లో చక్కర్లు కొట్టడంతో రాష్ట్రంలో మళ్లీ ఉద్రిక్త వాతావరణం నెలకొంది. మైతేయ్‌ వర్గానికి చెందిన యువతి (17), యువకుడు (20)లను కిడ్నాప్ చేసి అటవీ ప్రాంతంలో బంధించి వారిని హత్య చేసి ఉంటారని భావిస్తున్నారు.  అయితే, ఇది కుకీ వర్గానికి చెందిన దుండుగుల పనేనని పలువురు అనుమానాలు వ్యక్తం చేస్తున్నారు. ఈ క్రమంలో పెద్ద ఎత్తున నిరసనలు వెల్లువెత్తడంతో ప్రజలంతా సంయమనం పాటించాలని సీఎం బీరెన్‌ సింగ్‌ విజ్ఞప్తి చేశారు. అక్కడ ప్రస్తుతం ఇంటర్నెట్‌సేవల్ని సైతం నిలిపివేశారు.