Chidambaram: నిందితుడిగా నా పేరు లేదు.. మరి నా ఇంట్లో సోదాలు ఎందుకు..?

దిల్లీ: లంచం తీసుకున్నారనే ఆరోపణలతో మంగళవారం కాంగ్రెస్ నేత కార్తి చిదంబరం ఇల్లు, కార్యాలయాల్లో సీబీఐ సోదాలు జరిపింది. అలాగే ఆయన తండ్రి, కేంద్ర మాజీ మంత్రి చిదంబరం ఇళ్లలోనూ దర్యాప్తు సంస్థ సోదాలు చేపట్టింది. దీనిపై ట్విటర్ వేదికగా చిదంబరం అసహనం వ్యక్తం చేశారు. 

‘ఈ రోజు ఉదయం చెన్నైలోని మా ఇల్లు, దిల్లీలోని అధికారిక నివాసంలో సీబీఐ బృందం సోదాలు జరిపింది. అప్పుడు దర్యాప్తు సంస్థ అధికారులు నాకు ఎఫ్‌ఐఆర్ చూపించారు. అందులో నిందితుడిగా నా పేరు లేదు. చివరకు ఈ బృందం ఏమీ గుర్తించలేదు. వేటినీ స్వాధీనం చేసుకోలేదు’ అంటూ సోదాలు జరిగిన టైమింగ్‌ను ప్రశ్నించారు. 

కేంద్రంలో యూపీఏ ప్రభుత్వం అధికారంలో ఉన్న సమయంలో కార్తి రూ.50 లక్షలు తీసుకుని 250 మంది చైనా దేశస్థులకు వీసా సదుపాయం కల్పించారని ఆరోపణలు వచ్చాయి. దీంతో సీబీఐ ఆయనపై కొత్త కేసు నమోదు చేసింది. ఈ కేసు దర్యాప్తు నిమిత్తం మంగళవారం కార్తికి చెందిన ఇల్లు, కార్యాలయాల్లో సోదాలు నిర్వహించింది. చెన్నై సహా ముంబయి, కర్ణాటక, పంజాబ్‌, ఒడిశా, దిల్లీలోని 9 ప్రాంతాల్లో ఏకకాలంలో ఈ తనిఖీలు జరిగాయి. ఈ క్రమంలోనే చిదంబరం నివాసంలోనూ సోదాలు జరిగాయి. అయితే ఈ తనిఖీలపై కార్తి ట్విటర్‌ వేదికగా స్పందిస్తూ ఘాటు విమర్శలు చేశారు. ‘కౌంట్‌ మర్చిపోయా.. ఎన్నిసార్లు ఇలాంటి సోదాలు జరిగి ఉంటాయి? బహుశా ఓ రికార్డు అయ్యి ఉంటుంది’ అని రాసుకొచ్చారు. కార్తి ఇప్పటికే పలు కేసుల్లో విచారణ ఎదుర్కొంటోన్న విషయం తెలిసిందే.